एजेन्सी । गुजरात टाइटन्स र मुम्बई इन्डियन्सबीचको खेल सोचेभन्दा रोमाञ्चक सावित भएको छ । गुजरातका लागि ४५ रनको इनिङ खेलेपछि साई सुदर्शनले आफ्नो टोलीले राम्रो फिल्डिङ गरेमा १६८ रनको स्कोर रक्षा गर्न सक्ने बताएका थिए ।
उनको भविष्यवाणी सही साबित भएको छ, किनभने विशेष गरी अन्तिम ५ ओभरमा भएको बलिङमार्फत गुजरातले लगभग हारिसकेको खेल आफ्नो पोल्टामा पार्यो ।
मोहित शर्मा, उमेश यादव र राशिद खान जस्ता विश्व–स्तरीय बलरहरूले गुजरात टाइटन्सलाई अन्तिम ५ ओभरमा मुम्बई इन्डियन्सलाई हराउन मद्दत गरे । १५ ओभरको अन्त्यमा मुम्बई इन्डियन्सको स्कोर ३ विकेटमा १२६ रन थियो र टोलीलाई जितका लागि ५ ओभरमा ४३ रन आवश्यक थियो ।
रोमाञ्चक अन्तिम ५ ओभर
१६ औं ओभरमा मोहित शर्मा बलिङ गर्न आए, जसमा उनले ४ रन मात्र दिए । यो ओभरमा खेलको टर्निङ प्वाइन्ट पनि आयो किनभने ओभरको पाँचौं बलमा डिवाल्ड ब्रेभिसलाई मोहितले आफैँले क्याच आउट पारे । ब्रेभिस ४६ रन बनाएर क्रिजमा थिए, त्यसैले उनको आउट मुम्बई इन्डियन्सका लागि ठूलो झट्का थियो ।
रसिद खानले गरेको १७ औं ओभरमा पनि ३ रन मात्रै बनेको थियो, जसका कारण मुम्बई धेरै हदसम्म ब्याकफुटमा परेको थियो । ओभरमा ३ सिंगल मात्र आयो र यहाँबाट मुम्बईलाई अन्तिम ३ ओभरमा ३६ रन चाहिएको थियो ।
१८ औं ओभर पनि मोहित शर्माको हातमा दिइएको थियो । मोहितले ओभरको पहिलो ४ बलमा ९ रन दिएका थिए । खेलमा मुम्बई पुनरागमन गर्दैछ जस्तो लाग्थ्यो तर ओभरको अन्तिम बलमा टिम डेभिड पनि डेभिड मिलरको हातमा क्याच आउट परे ।
१९औं र महत्वपूर्ण ओभर स्पेन्सर जोन्सनले फ्याँके, जसलाई यसअघि नराम्ररी पिटिएको थियो । तिलक वर्माले आफ्नो पहिलो बलमा गगनचुम्बी छक्का प्रहार गरे पनि दोस्रो बलमा तिलकले ठूलो शट खेल्ने क्रममा आफ्नो विकेट गुमाए । जोन्सनको ओभरमा ८ रन आयो र मुम्बई इन्डियन्सलाई अन्तिम ओभरमा १९ रन चाहिएको थियो ।
२० औं ओभरमा कप्तान हार्दिक पाण्ड्याले उमेश यादवको अगाडि ठूला शट खेल्नु परेको थियो । पहिलो बलमा छक्का र दोस्रो बलमा चौकाले मुम्बईको आशा फेरि बलियो बनाएको थियो तर तेस्रो बलमा गलत समयमा लिएको शटका कारण हार्दिक लङअनमा क्याचको शिकार बने । अर्को बलमा पियुष चावला पनि प्याभिलियन फर्किए । उमेश यादवले ह्याट्रिक पूरा गर्न सकेनन्, तर गुजरातको ६ रनले जित सुनिश्चित गरे ।
