काठमाडौँ । इन्डियन प्रिमियर लिग (आईपीएल)को १७ औं सिजनमा आज पनि डबल हेडर (एक दिनमा २ खेल) खेलाइँदैछ । आजको पहिलो खेल राजस्थान रोयल्स र लखनउ सुपरजायन्ट्सबीच हुँदैछ ।
जयपुरको सवाई मानसिंह स्टेडियममा राजस्थान रोयल्सले टस जितेर ब्याटिङ गर्ने निर्णय गरेको छ । खेल दिउँसो ३ः४५ बजे सुरु हुनेछ ।राजस्थानका रियान पराग चौथो नम्बरमा ब्याटिङमा आउने भएका छन् । उनी छ वा सात नम्बरमा ब्याटिङ गरिरहेका हुन्थे ।
दोस्रो खेलमा ५ पटकको च्याम्पियन मुम्बई इन्डियन्सले २०२२ को विजेता गुजरात टाइटन्सको सामना गर्नेछ । खेल बेलुका ७ः४५ बजे सुरु हुनेछ ।
राजस्थान रोयल्सले लिग इतिहासमा पहिलो पटक २००८ मा उपाधि जितेको थियो । त्यसपछि टोलीले अर्को उपाधि जित्न सकेन । राजस्थान १४ सिजनमा दुई पटक फाइनलमा पुग्यो । जब टोली २०२२ मा फाइनलमा पुग्यो, उसले गुजरात टाइटन्सको सामना गर्यो । जसमा उसले ७ विकेटले हार बेहोरेको थियो ।
अर्कोतर्फ, यो लखनऊ सुपर जायन्ट्सको तेस्रो सिजन हो । टोलीले सन् २०२२ मा पहिलो पटक लिगमा भाग लिएको थियो । दुवै पटक टोली अंक तालिकाको शीर्ष ४ मा रहेर प्लेअफमा पुगेको थियो । तर दुवै पटक एलिमिनेटरमा पराजित भएपछि टोलीको यात्रा समाप्त भयो ।
राजस्थानका विस्फोटक ओपनर यशस्वी जैसवाल, जोस बटलर र कप्तान सञ्जु सामसनले टोलीको शीर्ष क्रमलाई बलियो बनाएका छन् । शुभम दुबे, रियान पराग र रोभमान पावेललाई थपेर मिडल अर्डरको बल पनि बढेको छ । यशस्वीले लखनउविरुद्धको २ खेलमा ८५ रन बनाएका छन् ।
राजस्थानको बलिङ पक्ष पनि उत्कृष्ट छ । नवदीप सैनी, कुलदीप सेन, ट्रेन्ट बोल्ट र आवेश खान जस्ता बलर छन् । पेसर बाहेक युजवेन्द्र चहल र रविचन्द्रन आश्विन जस्ता स्पिनर छन् । चहल लिगमै सर्वाधिक विकेट लिने खेलाडी हुन् । जबकि ट्रेन्ट बोल्टले लखनउ विरुद्धको ३ खेलमा मात्र ५ विकेट लिएका छन् ।
लखनउको ब्याटिङ पनि विस्फोटक छ
लखनऊको ब्याटिङ अर्डर पनि राजस्थानको जस्तै विस्फोटक छ, टोलीमा कप्तान केएल राहुलसँगै देवदत्त पडिक्कल, काइल मेयर्स, निकोलस पूरन र क्विन्टन डी कक जस्ता स्टारहरु छन् । राहुलले राजस्थानविरुद्ध १४ खेलमा ५७९ रन बनाएका छन् ।
लखनउको बलिङ पनि बलियो छ । रवि बिश्नोई, अमित मिश्रा र कृणाल पाण्ड्याजस्ता स्पिनरसँगै शमर जोसेफ, नवीन–उल–हक, मोहसिन खान र शिवम मावी जस्ता बलर पनि छन् । मिश्राको नाममा राजस्थानविरुद्ध ३० विकेट छ ।
हालसम्म राजस्थान र लखनउबीच आईपीएलमा ३ खेल मात्रै भएका छन् । राजस्थानले २ र लखनउले १ जित हात पारेको छ । यी दुई टोलीबीच अहिलेसम्म जयपुरमा एउटा खेल भएको छ । लखनउले यो खेल १० रनले जितेको थियो ।
