एजेन्सी । सनराइजर्स हैदरावादविरुद्ध कोलकाता नाइट राइडर्सको अन्तिम ओभरका नायक हर्षित राणालाई आईपीएलको आचार संहिता उल्लंघन गरेको आरोप लागेपछि उनलाई म्याच शुल्कको ६० प्रतिशत जरीवाना गरिएको छ ।
मयंक अग्रवाल र हेनरिक क्लासेनको विकेट लिएपछि राणाले आक्रोशित हुँदै डगआउटको बाटो देखाएका थिए ।
युवा फास्ट बलरले शनिबार आईपीएल २०२४ को तेस्रो खेलमा केकेआरका लागि नायकको भूमिका खेले र एसआरएच विरुद्धको रोमाञ्चक खेलमा टोलीलाई ४ रनले जित दिलाए । तर, हर्षित राणाको व्यवहारको तुलनामा उनको प्रदर्शन फिक्का भयो ।
हर्षित राणाले मयंक अग्रवाललाई आउट गरेपछि फ्लाइङ किस दिए, जसको कमेन्ट्रीका क्रममा महान ब्याट्सम्यान सुनिल गावस्करले पनि आलोचना गरेका थिए । त्यसपछि उनले क्लासेनको विकेट लिएपछि निकै उत्साहजनक ढंगले सेलिब्रेट गरे ।
आईपीएलले एक विज्ञप्ति जारी गर्दै हर्षित राणाले आईपीएल आचार संहिताको धारा २.५ अन्तर्गत दुई लेभल १ उल्लङ्घन गरेको र यसका लागि उनलाई म्याच फीको क्रमशः १० र ५० प्रतिशत जरीवाना गरेको जनाएको छ । विज्ञप्तिमा फास्ट बलरले म्याच रेफ्रीले लगाएको आरोपलाई स्वीकार गरेको पनि उल्लेख गरिएको छ ।
