काठमाडौं । प्रतिनिधिसभा बैठकमा आज प्रधानमन्त्री पुष्पकमल दाहालसँग सांसदहरुले प्रश्नोत्तर गर्ने भएका छन् ।
बिहान ११ बजे सुरु हुने बैठकमा सांसदहरुले सोधेका प्रश्नको जवाफ प्रधानमन्त्री दाहालले दिने छन् । कार्यव्यवस्था परामर्श समितिको बैठकले तय गरेको १५ दिनको पाक्षिक कार्यतालिका अनुसार आज प्रधानमन्त्रीसँग प्रश्नोत्तर हुन लागेको हो ।
प्रतिनिधिसभा नियमावली २०७९ को परिच्छेद ९ मा प्रत्येक महिनाको पहिलो साता प्रधानमन्त्रीसँग प्रश्नोत्तर हुनुपर्ने उल्लेख छ । यो कार्यक्रममा प्रधानमन्त्री वा प्रधानमन्त्रीको कार्यक्षेत्रसँग प्रत्यक्ष रुपमा सम्बन्धित विषयमा सांसदहरुले प्रश्न सोध्न सक्नेछन् ।
प्रधानमन्त्रीलाई सोधिन प्रश्नहरु सांसदहरुले संसद् सचिवालयमा टिपाइसकेका छन् ।
उपप्रधान तथा गृहमन्त्री रवि लामिछानेका विषयमा नेपाली कांग्रेसले प्रश्न उठाउँदै आएको छ । विशेष गरी सहकारी ठगीमा संलग्न रहेको भन्दै कांग्रेसले लामिछानेको राजीनामा मागेको छ । यस विषयमा प्रधानमन्त्री जवाफ दिनुपर्ने अडान पनि कांग्रेसको छ । यस विषयमा पनि प्रधानमन्त्री दाहालले स्पष्ट पार्नुहुने भएको छ ।
