लन्डन । इङ्लिस प्रिमियर लिगको शीर्ष स्थानमा सात अंकको अग्रता खोल्नको लागि म्यानचेस्टर सिटीले टोटनहमलाई सजिलै ३–० ले हरायो । सिटीले आफ्नो अपराजित यात्रालाई शनिबार १५ खेलसम्म पुर्याएको छ ।
यसमा इलकयी गुन्डोगनले दुई तथा रोडीले एक गोल गरे । यो जितपछि सिटीको २३ खेलबाट ५३ अंक भएको छ । लेस्टर सिटी ४६ अंकसाथ दोस्रो स्थानमा उक्लेको छ ।
उसले लिभरपुललाई अर्को खेलमा ३–१ ले हरायो । शनिबारको अर्को खेलमा बर्नलीले क्रिस्टल प्यालेसलाई ३–० ले पराजित गरेर पुछारतिर आफ्नो पकड बलियो बनायो । बर्नलीको २६ अंक भएको छ । शनिबार नै ब्राइटन र एस्टन भिल्लाबीचको खेल गोलरहित बराबरीमा टुंगियो ।
