काठमाडाैँ । दक्षिण कोरियाका लागि नेपालका प्रश्तावित राजदुत प्रा. डा. सङ्गम श्रेष्ठले दुई देशबीचको कूटनीतिक सम्बन्धलाई केवल औपचारिकतामा मात्र सिमित नराखी नेपालको आर्थिक समृद्धि र नागरिक सुरक्षाको आधारस्तम्भ बनाउने प्रतिवद्धता व्यक्त गर्नुभएको छ ।
मङ्गलवार संघीय संसदको संसदीय सुनुवाई समितिको बैठकमा आफ्नो चार वर्षे कार्ययोजना प्रश्तुत गर्दै उहाँले प्रविधि हस्तान्तरण, हरित विकास, व्यापार घाटा न्युनिकरण र प्रवासी नेपालीहरूको हित रक्षालाई आफ्नो मुख्य कार्यभारका रूपमा अघि सार्नुभएको हो । डा. श्रेष्ठले नेपालको संविधान र परराष्ट्र नीतिद्वारा निर्देशित रहेर कोरियासँगको ५० वर्षे सम्बन्धलाई पुनर्गठन गर्ने योजना अघि सार्नुभयो । कोरियामा कार्यरत ९१ हजारभन्दा बढी नेपालीहरूको मर्यादा, सुरक्षा र हकहितको संरक्षणलाई उनले आफ्नो पहिलो र सर्वोच्च प्राथमिकतामा राख्नुभयो ।
उहाँले आपतकालीन सहायताका लागि २४सै घण्टा सञ्चालन हुने ‘एकीकृत मुद्दा व्यवस्थापन प्रणाली’ स्थापना गर्ने र सोल बाहिर घुम्ती शिविरमार्फत सेवा प्रवाह गर्ने प्रतिवद्धता जनाउनु भयो ।
आर्थिक कुटनीतिका सन्दर्भमा उहाँले नेपाल र कोरियाबीचको बढ्दो व्यापार घाटाप्रति चिन्ता व्यक्त गर्दै निर्यात प्रवद्र्धन र प्रत्यक्ष वैदेशिक लगानी भित्र्याउन जोड दिनुभयो । कोरियाको प्रविधि र नेपालको सम्भावनालाई जोड्न स्वच्छ ऊर्जा, कृषि प्रशोधन, पर्यटन र विद्युतीय यातायातमा लगानीयोग्य परियोजनाहरू तयार गरिने उहाँको भनाइ छ । उहाँले कोरियालाई श्रम गन्तव्य मात्र नभई नेपालको औद्योगिक रूपान्तरण र प्रविधि हस्तान्तरणको रणनीतिक साझेदारका रूपमा विकास गर्ने योजना सार्वजनिक गर्नुभयो ।
आफ्नो प्राज्ञिक र संस्थागत अनुभवलाई आधार मान्दै डा. श्रेष्ठले कोरियाली वैज्ञानिक तथा प्राविधिक सञ्जालसँगको दशकौँ पुरानो सम्बन्धलाई दुई देशबीचको नीतिगत र प्राविधिक सहकार्यमा उपयोग गर्ने बताउनु भयो । उहाँले संसदीय सुनुवाइ समितिमा प्रश्तुत गर्नुभएको कार्ययोजनामा नागरिक सेवा, संसदीय संवाद, आर्थिक कूटनीति, डिजिटल रूपान्तरण र जलवायु उत्थानशीलतासहितका सातवटा रणनीतिक स्तम्भहरू समेटिएका छन् ।
राजदूतको कार्यकाल सकिएपछि पनि नेपाल–कोरियाबीचको सहकार्य निरन्तर रहोस् भन्ने उद्देश्यले संस्थागत अभिलेख र अनुगमन प्रणाली स्थापना गर्ने उहाँको योजना छ । समितिसमक्ष उनले आफ्नो अनुभव, कोरियासँगको सञ्जाल र स्पष्ट मार्गचित्रसहितको कार्ययोजना प्रश्तुत गर्दै नियुक्त भएपश्चात नतिजामुखी काम गर्ने दृढता व्यक्त गर्नुभयो ।
