काठमाडौं । नेपाली काँग्रेसका सभापति शेरबहादुर देउवाले सरकारले तोकेको निर्वाचन नजिकिँदा पनि आयोगले कार्यतालिका सार्वजनिक नगरेकोमा शंका व्यक्त गरेका छन्।
सोमबार कांग्रेस रुपन्देहीले भैरहवामा गरेको विरोध सभालाई सम्बोधन गर्दै देउवाले निर्वाचनको मिति नजिकिँदा पनि आयोगले कार्यतालिका सार्वजनिक नगर्नु शंकास्पद विषय भएको बताएका हुन् ।
देउवाले भने, 'ओलीले संसद विघटन गरेको छ। संसद विघटन गरेको ६ महिनाभित्र चुनाव गराइसक्नुपर्छ। तर निर्वाचन आयोगले अझै किन कार्यतालिका ल्याउँदैन ?'
आयोगले जेठको अन्त्यसम्म चुनाव गराउनैपर्ने बाध्यता रहेकाले चाँडो कार्यतालिका ल्याउनुपर्ने देउवाले बताए। 'जेठको अन्त्यसम्म चुनाव गर्नैपर्छ। तर निर्वाचन आयोग चुनाव गराउँछु भनेर बोलेकै छैन। बदमासी गर्न सक्छ आयोगले,' उनको प्रश्न थियो, 'किन बोल्दैन निर्वाचन आयोग ? म यहीबाट भन्न चाहन्छु। ओलीले वैशाखसम्म चुनाव गराउँछु गराउँछु भनेको छ। निर्वाचन आयोगले किन बोल्दैन। शंका गर्नुपर्ने बेला भएको छ।'
प्रतिनिधि सभा विघटन असंवैधानिक कदम भए पनि आजको विरोध सभामा देउवाले यस विषयमा अदालतको विचाराधीन मुद्दा भएकाले बोल्न नमिल्ने बताएका छन् । 'अदालतको विचाराधीन मुद्दामा यसो गर उसो गर भन्न मिल्दैन नि। अदालतको निर्णय हुन दिउँ।' देउवाले अदालतले न्याय नदिए त्यो भन्दा ठूलो अदालत जनता भएको बताए।
