काठमाडौं । नेपाली कांग्रेस र नेकपा माओवादी केन्द्रबीच उत्पन्न विश्वासको संकटका कारण धरापमा परेको सत्ता गठबन्धनको बैठक स्थगित भएको छ ।
प्रधानमन्त्री निवास बालुवाटारमा बिहान ८ बजेका लागि बोलाइएको बैठक अन्तिम समयमा आएर स्थगित गरिएको हो । सत्ता गठबन्धनका दलहरुबीच समसामयिक परिस्थितिमा छलफल गर्न भन्दै बोलाइएको बैठक स्थगित गरिएको हो ।
बैठकमा सत्य निरुपण तथा मेलमिलाप आयोग र बेपत्ता छानबिन सम्बन्धी विधेयकसम्बन्धी प्रतिवेदनमाथि छलफल गर्ने भनिएको थियो । तर राजनीतिक तरलताको अवस्था सिर्जना भएपछि यो विषय पुन: ओझेलमा पर्ने भएको छ ।
बाल्कोटमा एमालेको बैठक
यसैबीच नेकपा एमाले सचिवालयको बैठक अध्यक्ष केपी शर्मा ओलीको निवास बालकोटमा बसिरहेका छ । हिजो साँझ दुई पटक प्रधानमन्त्री पुष्पकमल दाहालसँग भेट गरेर नयाँ सत्ता समीकरणबारे छलफल गरेका ओलीले आज सचिवालय बैठक बोलाएका हुन् । बैठकमा नयाँ राजनीतिक परिस्थितिका विषयमा छलफल भइरहेको बताइएको छ ।
प्रधानमन्त्री दाहाल र एमाले अध्यक्ष ओलीबीच हिजो पुस १० गतेकै अवस्थामा फर्कने सहमति भएको बताइएको छ । यसको अर्थ एमाले र माओवादी केन्द्रसहितका दलको सरकार गठन हुने छ । पुस १० गते अघि पनि एमाले, माओवादी केन्द्र, राष्ट्रिय स्वतन्त्र पार्टीलगायतको दलका सरकार थियो ।
