भक्तपुर । नेपाल मजदुर किसान पार्टीले नेकपा भित्रको भागवण्डाको विवादको कारण प्रतिनिधिसभा विघटन भई ताजा जनादेशको लागि निर्वाचन मिति घोषणा स्वभाविक भएको ठहर गरेको छ । नेमकिपाको ३१ औ परिषदको बैठकले चुनावमा वैचारिक सङ्घर्ष मुख्य हुने उल्लेख गरेको छ ।
केन्द्रीय परिषद पार्टी अध्यक्ष नारायणमान विजुक्छे (रोहित) को अध्यक्षतामा बसेको बैठकले राष्ट्रिय दलको मान्यता प्राप्त गर्न प्रतिनिधिसभाको निर्वाचनमा तीन प्रतिशत मत प्राप्त गर्नुपर्ने प्रजातन्त्र विपरीतका कानुनी प्रावधान खारेज गराउन जिल्ला जिल्लामा विरोध अभियान जारी राख्ने निर्णय गरेको छ ।
फागुन ८, ९ र १० गते भक्तपुरमा भएको पार्टी केन्द्रीय परिषदले केन्द्रीय समितिको प्रतिवेदन र राष्ट्रिय एवम् अन्तराष्ट्रिय प्रस्ताव पारित गरेको सचिब प्रेम सुवालले जारी गर्नुभएको बिज्ञप्तिमा उल्लेख छ । परिषदले पार्टी समिति र जनवर्गीय एवम् पेशागत समाजको सङ्गठनमा पार्टी प्रकाशनको अध्ययन, अन्तरक्रिया र प्रदर्शनीलाई चालू राख्ने निर्णय समेत गरेको छ । एमाले र माओवादीजस्ता कम्युनिष्ट दावी गर्नेहरु पुजीवाद र सामन्तवादको पृष्ठपोषक भएको ठहर समेत नेमकिपाले गरेको छ ।
पार्टी केन्द्रीय समितिको प्रतिवेदनमा भारत सरकारले नेपाली भूमि लिम्पियाधुरा, कालापानी, लिपुलेक अतिक्रमण गरी भारतको नक्सामा गाभेको विरोधमा भारतीय दूतावासमार्फत विरोधपत्र दिएको र नेपाली भूमि गुन्जीदेखि लिपुभन्ज्याङ्ग सम्म सडक बनाएकोमा पनि बिरोध जनाएको छ ।