एजेन्सी । अन्तर्राष्ट्रिय क्रिकेट काउन्सिल (आईसीसी)ले श्रीलंकाका कप्तान वानिन्दु हसरंगालाई २ खेलको प्रतिबन्ध लगाएको छ । साथै अफगानिस्तानका विकेटकिपर रहमानउल्लाह गुरबाजको पनि १५ प्रतिशत म्याच शुल्क काटिएको छ । बुधबार डम्बुलामा भएको तेस्रो टी–२० अन्तर्राष्ट्रिय खेलमा दुवैले आईसीसीको आचारसंहिता उल्लंघन गरेका थिए ।
स्पिन अलराउन्डर हसरंगाले २४ महिनाभित्र ५ डिमेरिट अंक पाएपछि प्रतिबन्ध लगाइएको आईसीसीले जनाएको छ । जसमा बुधबार अफगानिस्तानसँगको खेलबाट २ डिमेरिट अंक समावेश छ । काउन्सिलले भन्यो – ‘हसरंगाको ५ डिमेरिट पोइन्ट २ निलम्बनमा परिणत भयो ।’
काउन्सिलले थप भन्यो – ‘यस प्रतिबन्धको अर्थ हसरंगालाई एक टेस्ट वा दुई एकदिवसीय वा टी–२० अन्तर्राष्ट्रिय, जुन पहिले हुन्छ त्यसको प्रतिबन्धको सामना गर्नुपर्नेछ ।’
हसरंगाले मार्चमा बंगलादेशविरुद्धको पहिलो दुई टी–२० अन्तर्राष्ट्रिय खेलमा भाग लिन पाउने छैनन् । उनी सिरिजको उत्कृष्ट खेलाडी चुनिएका थिए । अन्तिम खेलमा अफगानिस्तानले ३ रनले पराजित गरे पनि श्रीलंकाले सिरिज २–१ ले जितेको थियो ।
