काठमाडौं । मिटरब्याज पीडितसँग वार्ता गर्न सरकारले वार्ता टोली बनाएको छ । गृह मन्त्रालयले सह–सचिव रूद्रप्रसाद पण्डितको संयोजकत्वमा वार्ता टोली गठन भएको हो ।
मिटरब्याज तथा ठगीविरुद्ध किसान मजदुर संघर्ष समिति केन्द्रीय सचिवालय सदस्य अजय कार्कीले वार्ता जाने विषयमा छलफल भईरहेको बताए ।
यसअघि मन्त्रालयले मिटरब्याज तथा ठगीविरुद्ध किसान मजुदर संघर्ष समितिका अध्यक्ष अवधेश कुशवाहालाई सम्बोधन गरेर वार्ताका लागि पत्र पठाएको थियो । तर, व्यक्तिगत रुपमा सम्बोधन गरेर पत्र पठाएको भन्दै समितिले छलफलमा नजाने निर्णय गरेको थियो ।
पछि फेरी मन्त्रालयले समितिको नाममा पत्र पठाएपछि उनीहरु वार्ताको लागि तयार भएका हुन् । पत्रमा सह–सचिव पण्डितको नेतृत्वमा समिति बनाइएको र पीडितका तर्फबाट पनि ५ सदस्यीय टोली गठन गरेर आउन भनिएको छ ।
देशभरका मिटरब्याजी पीडितहरू विगत २६ दिनदेखि आन्दोलन गर्दै आएका छन् । पूर्वको मेचीदेखि पश्चिमको महाकालीबाट पैदलयात्रा गरेर काठमाडौँ आइपुगेका उनीहरु सिंहदरबार तथा भृकुटीमण्डप केन्द्रित आन्दोलन गरिहेका छन् ।
