काठमाडौँ । आईसीसी पुरुष क्रिकेट विश्वकप लिग–२ को त्रिकोणात्मक शृङ्खला अन्तर्गत नेदरल्यान्ड्सले नेपाललाई पराजित गरेको छ । कीर्तिपुरस्थित त्रिवि मैदानमा भर्खरै सम्पन्न खेलमा नेदरल्यान्ड्सले नेपाललाई ८ विकेटले पराजित गरेको हो । योसँगै यसअघिको खेलमा ९ विकेटले पराजय बेहोरेको नेदरल्यान्ड्सले आजको जितसँगै नेपाललाई बदला लिएको छ ।
नेपालले दिएको १७३ रनको लक्ष्य नेदरल्यान्ड्सले ३७.५ ओभरमा २ विकेट गुमाएर भेट्टायो । उसका लागि विक्रमजित सिंह ५८ तथा सिब्रान्ड एंगलब्रेच्ट ४६ रनमा अविजित रहे । म्याक्स ओ’डोडले २८, माइकल लेभिटले ३९ रनको योगदान दिए । बलिङतर्फ नेपालका ललित राजवंशी र दिपेन्द्र सिंह ऐरीले एक–एक विकेट लिए ।
त्यसअघि टस हारेर पहिले ब्याटिङको निम्तो पाएको नेपालले ४९ दशमलव तीन ओभरमा सबै विकेट गुमाउँदै एक सय ७२ रनमात्रै बनायो ।
नेपालका लागि कुशल भुर्तेलले ९३ बल खेल्दै आठ चौकाको मद्दतमा ६६ रन बनाए । त्यस्तै करण केसीले २६ रन जोड्दा आरिफ शेखले २२ रन जोडे । आसिफ शेखले १७, कप्तान रोहितकुमार पौडेलले १६, अनिल शाहले ७ र गुलशन झाले ५ रन बनाए ।
नेदरल्यान्ड्सका आर्यन दत्त र भिभियन किङ्ग्माले समान तीन/तीन विकेट लिए । यसैगरी बास डि लिडेले दुई विकेट लिँदा रोलेफ भान डर मर्वेले एक विकेट लिए ।
लिगमा २४ त्रिदेशीय शृङ्खलाअन्तर्गत पहिलो शृङ्खला नेपालमा भएको हो । आगामी सन् २०२७ सम्म चल्ने उक्त लिग–२ मा नेपालसहित आठ टोलीको सहभागिता हुनेछ । पहिलो सिरिजमा नेपाल, नामिबिया र नेदरल्यान्यड्सबीच प्रतिस्पर्धा भएको हो । आजको यो खेलसँगै पहिलो शृङ्खला समाप्त भएको छ ।
४ खेल सम्पन्न हुँदा नामिबिया ३ खेलमा जितसहित ६ अंक जोडेर तालिकाको शीर्षस्थानमा छ । यस्तै, २ जित निकालेको नेदरल्यान्ड्स ४ अंकसहित दोस्रो स्थानमा रहँदा १ खेलमा जित र ३ खेलमा पराजय बेहोेरेको नेपाल तेस्रो स्थानमा छ ।
लिग–२ मा आठ टिमले कुल १४४ एकदिवसीय खेल खेल्नेछन् भने २४ त्रिकोणात्मक सिरिजमा प्रतिस्पर्धा हुनेछ । आठमध्ये शीर्ष चारमा पर्ने टिमको एकदिवसीय मान्यता स्वतः कायम रहन्छ भने विश्वकप छनोटमा सिधा स्थान बनाउनेछन् । यसअघि शीर्ष तीन टोली विश्वकपमा सिधै छनोट भएका थिए ।
बाँकी चार टिमका लागि दोस्रो अवसर हुनेछ । चार टिमले विश्वकप क्वालिफायर प्लेअफ खेल्नेछन्, जहाँ विश्वकप च्यालेन्ज लिगबाट आउने चार टिम गरी आठ टिमबीच प्रतिस्पर्धा हुनेछ ।
