काठमाडौँ । नेपाली कांग्रेस महासमिति बैठकमा महामन्त्री गगन थापाले पेस गर्ने सांगठनिक प्रतिवेदनमा अझै सहमति जुट्न सकेको छैन ।
महामन्त्री थापाले यसअघि केन्द्रीय समिति बैठकमा आगामी चुनावअघि गठबन्धन गर्न नहुने सुझावसहितको प्रतिवेदन पेस गरेका थिए । उक्त सुझावमा सभापति शेरबहादुर देउवाले आपत्ति जनाएका छन् ।
गठबन्धनबारे महामन्त्री थापाको उक्त प्रतिवेदन सच्चाउन देउवाले दबाब दिइरहेका छन् । तर उनी भने उक्त प्रतिवेदन नसच्चाई जस्ताको तस्तै महासमितिमा पेस गर्ने अडानमा छन् ।
सभापति देउवाले असहमति जनाएपछि महामन्त्री थापा र देउवाबिच शनिबार साँझ र आइतबार छलफल गरेका थिए । तर, गगनले आफू प्रतिवेदन सच्चाउन तयार नभएको जवाफ दिएपछि सहमति हुन सकेको थिएन । महामन्त्री थापा सोमबार बिहान फेरि देउवा निवास बूढानीलकण्ठमा छलफलका लागि पुगेका छन् ।
कांग्रेसको महासमितिको बैठक आजदेखि ललितपुरको गोदावरीमा सुरु हुँदैछ । राजनीतिक स्थायित्व, रुपान्तरण र नविनता !स्वतन्त्रता, न्याय र समानता !! नेपाली कांग्रेसको नीतिगत प्रतिवद्धता । भन्ने मूल नाराका साथ सुरु हुन लागेको महासमिति बैठकमा देशभरबाट दुई हजारभन्दा बढी महासमिति सदस्यको सहभागिता हुँदैछ ।
