काठमाडौँ । नेपाली काँग्रेसका सांसद दीपक खड्काले आफूले विधिसम्मत ढंगले नेपाल स्काउटको संरचना भाडामा लिएको बताउनुभएको छ ।
आईतवार प्रतिनिधि सभा बैठकको आकस्मिक समयमा बोल्दै सांसद खड्काले आफूले वि.सं. २०६३ सालमा टेण्डर प्रक्रियामार्फत स्काउटको भवन भाडामा लिएको बताउनुभएको हो ।
उहाँले १० वर्षपछि पुन: टेण्डरमार्फत सबै प्रक्रिया पूरा गरेर भाडामा लिएको भएपनि आफ्नो चरित्र हत्या गरिएको बताउनु भयो । उहाँले ०७५ सालमा लोकबहादुर भण्डारी प्रमुख भएर आएपछि विवाद र किचलो शुरु भएको भन्दै आफूलाई सत्ताको बलमा उतिखेरै निकाल्न खोजिएको बताउनु भयो । उहाँले आफ्नो कुनै कमजोरी नभएको भन्दै अदालतमा मुद्दा विचाराधिन रहेको र कुनै दोष देखिएमा कारबाहीको भागिदार हुने पनि बताउनु भयो ।
उहाँले भन्नुभयो – ‘यो विधिवत् ढंगले २०६३ सालमा टेण्डरमार्फत त्यहाँका भवनहरु भाडामा लिइएको हो । र १० वर्षपछि पुन: टेण्डरमार्फत त्यस भवनको प्रक्रिया पूरा गरेर भाडामा लिएको हो । तीन वटा संरचनाहरु खड्काल्याण्डले उपयोग गर्दै आएको छ । एउटा खालि जग्गा उपयोग गरेर व्यवसाय सञ्चालन गरेको छ । दुई वटा नेपाल स्काउटले आफ्नो भवन निर्माण गरेर भाडामा लगाएको अवस्था छ । तेस्रो विभिन्न संरचनाहरु सञ्चालन गरिएको छ र ति संरचनाहरुको कुनै आय, व्यय कुनै वास्ता गरिएको छैन ।’
उहाँले आफूले स्काउटलाई अहिलेसम्म भाडा बापत १३ करोड रुपैयाँ बुझाइसकेको पनि बताउनु भयो । उहाँले अध्यक्ष भण्डारीले ऐन, नियम विपरित स्काउटलाई कब्जा गरेको आरोप समेत लगाउनु भयो ।
