काठमाडौं । समाजवादी मोर्चाको संयोजकमा नेकपाका महासचिव नेत्रविक्रम चन्द विप्लव चयन भएका छन् । आज बिहान बसेको मोर्चाको बैठकले चन्दलाई संयोजक तोकेको हो ।
नेकपा माओवादी केन्द्र, जसपा, एकीकृत समाजवादी र नेत्रविक्रम चन्द विप्लव नेतृत्व पार्टीले गत असार ४ गते समाजवादी मोर्चा घोषणा गरेका थिए ।
आलोपालो नेतृत्व सम्हाल्ने प्रावधान अनुसार विप्लवलाई संयोजक बनाइएको हो । यसअघि सुरुमा नेकपा माओवादी केन्द्रका अध्यक्ष पुष्पकमल दाहाल प्रचण्ड र त्यसपछि माधव कुमार नेपालले सम्हालेका थिए ।
मोर्चाको बैठकपछि पत्रकारसँग कुरा गर्दै माओवादी केन्द्रका महासचिव देव गुरुङले अहिलेसम्म ५८ जिल्लामा समाजवादी मोर्चाको संयोजन समिति गठन भएको बताए । साथै उनले देशका प्रमुख सहरमा जनपरिचालनको कार्यक्रम आयोजना गरिने बताए ।
