एजेन्सी । मुकेश अम्बानीको नेतृत्वमा रहेको रिलायन्स इन्डस्ट्रिजको शेयर २० लाख करोड रुपैयाँको बजार पुँजीकरण लक्ष्य पार गर्ने पहिलो सूचीबद्ध भारतीय कम्पनी बनेको छ ।
मंगलबार बीएसईमा कम्पनीको स्टक १.८९ प्रतिशतले बढेर ५२ हप्ताको उच्च रु. २९५७.८० मा पुगेको छ । पछिल्लो दुई हप्तामा मात्रै शेयरको बजार मूल्य १ लाख करोड रुपैयाँले बढेको छ ।
जनवरी २९ मा १९ लाख करोड रुपैयाँको स्तरमा पुगेको थियो । यस क्यालेन्डर वर्षमा अहिलेसम्म भारतको सबैभन्दा मूल्यवान स्टकको मूल्य झण्डै १४ प्रतिशतले बढेको छ ।
रिलायन्सको मार्केट क्यापमा हालैको वृद्धिका कारण, यसका प्रमुख मुकेश अम्बानीको नेटवर्थ २०२४ मा १२.५ बिलियन डलरले बढेर १०९ बिलियन डलर पुगेको छ । ब्लूमबर्ग बिलियनेर्स इन्डेक्सका अनुसार उनी सबैभन्दा धनी भारतीय हुन् र विश्वका धनीहरूको सूचीमा ११ औं स्थानमा पुगेका छन् ।
मुम्बईमा रहेको रिलायन्स समूहले तेलदेखि दूरसञ्चार क्षेत्रमा काम गर्छ र बजारमा यसको छुट्टै उपस्थिति छ ।
