विराटनगर । सुनसरीको इनरुवाबाट प्रहरीले भारतीय नम्बर प्लेटको स्करपियो गाडीमा एक करोड ८२ लाख ५१ हजार नक्कली नोट बरामत गरेको छ ।
नेपाल ल्याउँदै गरेको अवस्थामा इनरुवा नगरपालिका–४ स्थित सुनसरी खोलाको पुलनजिकबाट आइतबार नेपाली १ हजार दरका नक्कली नोटहरू बरामद गरिएको सुनसरी प्रहरी प्रमुख एसपी विपिन रेग्मीले जानकारी दिए ।
सवारीसाधन चेकजाँचमा खटिएको ट्राफिक प्रहरीको टोलीले बीआर ११ एक्स ३४२९ नम्बरको स्कारपियो गाडी खानतलासी गर्दा पछाडिको भागमा लुकाइछिपाई ल्याइएको नक्कली नोटहरू बरामद भएको एसपी रेग्मीले बताए । बोराभित्र झोलामा राखेर नक्कली नोट ल्याइएको अवस्थामा फेला परेको उनले बताए
प्रहरीले स्कारपियो चालक भारत वीरपुरका २२ वर्षीय मोहमद सैयदलाई पक्राउ गरेको छ भने गाडीमा सवार अर्का व्यक्ति फरार रहेका छन् ।
स्कारपियो र चालकलाई नियन्त्रणमा लिएर अनुसन्धान भईरहेको एसपी रेग्मीले बताए ।
