काठमाडौँ । नेपाली काँग्रेसका महामन्त्री तथा सांसद गगनकुमार थापाले गृहमन्त्री रवि लामिछानेले आफूलाई दिएको चुनौति स्वीकार गरेको बताउनुभएको छ ।
शुक्रवार प्रतिनिधि सभा बैठकपछि गृहमन्त्री लामिछानेले आफूले सूर्यदर्शन सहकारीबाट निवेदन दिएर ऋण लिएको प्रमाणित गर्न थापालाई चुनौति दिनुभएको थियो । प्रमाण दिन नसके थापाले राजनीति छोड्नुपर्ने उहाँको शर्त थियो । सञ्चारकर्मीहरुलाई प्रतिक्रिया दिँदै महामन्त्री थापाले प्रमाण पेश गर्न नसके आफू राजनीति छाड्न तयार रहेको बताउनु भयो ।
उहाँले आफूहरुसँग भएको तथ्य, प्रमाणले आफूहरुले बोलेको कुरा प्रमाणित गर्ने दाबी गर्नुभयो । उहाँले आफू व्यक्तिले मात्रै नभई सिंगो नेपाली काँग्रेसले गृहमन्त्रीमाथि प्रश्न उठाएको भन्दै तथ्य प्रमाण नपुगे काँग्रेसलाई क्षति हुने भन्दै प्रमाण पुग्ने दाबी गर्नुभयो । उहाँले संसदीय छानविन समिति बनाएर छानविन गर्न गृहमन्त्री तयार हुनुपर्ने बताउनु भयो ।
उहाँले भन्नुभयो – ‘छानविन गर्दा राजीनामा पनि चाहिँदैन । गृहमन्त्री भएर प्रमाण लुकाइसक्नु भयो । जे जति कुरा गर्नुपर्ने थियो उहाँले गरिसक्नुभएको छ । तथ्य, प्रमाण तोडमोड गरिसक्नु भयो । त्यसैले हामीलाई राजीनामा पनि चाहिँदैन । तर त्यति तोडमोड गर्दै गर्दापनि यति तथ्य प्रमाणहरु छन् कि, जसको आधारमा हामी जे कुरा भनिरहेका छौँ, त्यसको पुष्टि हुन्छ भन्नेकुराको हामीलाई शतप्रतिशत विश्वास छ । त्यसकारणले गर्दा संसदीय छानविन समिति सरकारले नबनाइकन पेलपाल गरेर अब हामी नीति, कार्यक्रम ल्याउँछौँ । अब हामी बजेट ल्याउँछौँ भनेर उहाँहरुले सोच्नुभएको छ भने अहिलेसम्म संसदभित्र छ, संसदभित्र मात्रै विषय सिमित रहँदैन । हामीले उठाएको विषयलाई सरकारले यसैगरी पेलेर लाने सोच बनायो भने संसदबाट सडकमा आउँछ । थप सरकारले त्यही ढंगको सामना गर्ने कुरामा तयार रहनुपर्छ ।
म त छोडिदिन्छु भनिसके त । उहाँले कहिले काठमाडौं क्षेत्र नं. ४ मा आउँछु भन्नुहुन्छ, त्यहाँ पनि आउनुस् । वागमतीमा नुहाउँछु भन्नुभयो नुहाउनुस् । छोडदिनुस् भने छोडिदिन्छु । चुनौति त मैले स्वीकार गरिहाले । त्यहाँ तथ्य, प्रमाण पुष्टि भएन भने सिंगो नेपाली काँग्रेस पार्टीलाई त्यसले कति क्षति पु¥याउँला ? कत्रो ठूलो लज्जाको विषय होला ? कत्रो ठुलो विश्वसनीयताको प्रश्न आउँला ? सिंगो नेपाली काँग्रेस पार्टी नै यो कुरा यसरी भनिरहेको छ भने यो चुनौतिको हाँक स्वीकार नगर्ने भन्ने त कुरै भएन ।’
महामन्त्री थापाले एमालेले भनेजस्तो आफूहरुले समिति बनाउनासाथ गृहमन्त्रीको राजीनामा नमाग्ने स्पष्ट पार्नुभयो । उहाँले नेपाली काँग्रेसले २०८४ सालसम्म सरकारतिर फर्केर पनि नहेर्ने भन्दै सरकार ढाल्नका लागि छानविन समिति गठनको माग नगरेको बताउनु भयो ।
