ललितपुर । इमाडोलमा महिला र दुई बच्चाको मृत्यु भएको छ ।
ललितपुरको महालक्ष्मी नगरपालिका–४ स्थित इमाडोल ओचुहाइटमा बस्ने ३६ वर्षीया रविना महर्जनले ४ तले घरको छतबाट हामफाल्दा मृत्यू भएको जिल्ला प्रहरी परिसर ललितपुरका प्रवक्ता प्रहरी उपरीक्षक नवराज कार्कीले जानकारी दिए ।
छतबाट हामफालेर गम्भीर घाइते भएकी रविनालाई उपचारको लागि किस्ट अस्पतालमा लगिएको थियो । उनको उपचारको क्रममा शनिबार राति ९ बजे मृत्यु भएको हो ।
रविनाका दुईजना बच्चाहरुको पनि मृत्यु भएको छ । ६ वर्षीय छोरा अश्वेत महर्जन र छोरी रीभा महर्जन कोठामा अचेत फेला परेपछि स्थानियले उपचारका लागि अस्पताल पुराएका थिए । उनीहरुको पनि मृत्यु भएको प्रहरीले जनाएको छ ।
घरमा उनी श्रीमान्, सासु र दुई सन्तानसहित बस्दै आएकी थिइन् । घटना हुँदा श्रीमान घरमा नभएको र सुसाइट नोट समेत फेला नपरेकाले कारण खुल्न नसकेको एसपी कार्कीले जानकारी दिए । घटनाबारे अनुसन्धान जारी रहेको छ ।
