काठमाडौ । राष्ट्रपति विद्यादेवी भण्डारीले आर्थिक समानताबिना सामाजिक तथा सांस्कृतिक विभेदको अन्त्य हुन नसक्ने बताउनु भएको छ । १११औँ अन्तर्राष्ट्रिय महिला दिवसको अवसरमा महिला बालबालिका तथा ज्येष्ठ नागरिक मन्त्रालयद्वारा आयोजित कार्यक्रमलाई सम्बोधन गर्दे राष्ट्रपति भण्डारीले परिवार र समाजमा छोरा र छोरी दुबै सन्तान समान हुन् भन्ने दृष्टिकोणलाई आत्मसात गर्दै अघि बढेको अवस्थामा नै वास्तवमा महिला समानता कायम हुने बताउनु भयो ।
कार्यक्रममा राष्ट्रपति भण्डारीले तेजाब आक्रमण विरुद्ध साहसिक अभियान सञ्चालन गर्ने किशोरी मुस्कान खातुनलाई नेपाल सरकार सहित अन्तर्राष्ट्रिय संघ संस्थाले सम्मान गरेकोमा खुशी व्यक्त गर्दै बधाई दिन दिनुभयो । उहाले भन्नुभयो हिंसामुक्त निर्माण गर्ने उहाँको अभियानको निरन्तरताको लागि शुभकामना व्यक्त गर्दछु ।राष्ट्रपति भण्डारीको सम्बोधनको पूर्णपाठ
विश्वभरका महिलाहरूले हासिल गरेका राजनीतिक, आर्थिक र सामाजिक उपलब्धीहरूलाई स्मरण गर्दै महिला अधिकार तथा लैङ्गिक समानताको पूर्ण प्राप्तिका लागि हरेक वर्ष ८ मार्चलाई अन्तर्राष्ट्रिय महिला दिवसको रूपमा मनाउने गरिएको छ ।
कोभिड–१९ को महामारीको यस विषम परिस्थितिका बीच पनि यस बर्ष हाम्रो देशमा “महिलाको सुरक्षा, सम्मान र रोजगारः समृद्ध नेपालको आधार” भन्ने राष्ट्रिय संकल्पका साथ मनाउन लागिएको १११औँ अन्तर्राष्ट्रिय महिला दिवसको अवसरमा म सम्पूर्ण दिदी बहिनीहरूमा सुख, शान्ति र समृद्धिको कामना गर्दछु । साथै दाजुभाईहरुलाई पनि धेरै धेरै शुभकामना व्यक्त गर्दछु ।
महिला हक अधिकार स्थापित गर्न तथा महिला हिंसा न्यूनीकरण गर्न राष्ट्रिय तथा अन्तर्राष्ट्रिय स्तरमा विभिन्न प्रयासहरु भएका छन् । हाम्रो देशमा संवैधानिक तथा कानूनी प्रावधान एवं नीति तथा कार्यक्रमहरू समेत राम्रोसँग निर्माण भएका छन् । यी प्रावधानहरुको प्रभावकारी कार्यान्वयन हुँदै जाँदा महिला समानता कायम गर्न तथा विभेदको अन्त्य गर्न महत्वपूर्ण योगदान पुग्ने नै छ । यसका लागि राज्यका कार्यान्वयन गर्ने अङ्ग तथा निकायहरु सिर्जनात्मक रूपमा थप क्रियाशील हुनुपर्ने मैले आवश्यकता महसुस गरेको छु ।
लैङ्गिक समानताका लागि हालसम्मका प्रयासहरूले महिलाको राजनीतिक तथा प्रशासनिक प्रतिनिधित्व उल्लेखनीय रूपमा बढिरहेको छ । शिक्षा, स्वास्थ्य, सम्पत्तिमाथिको स्वामित्व तथा श्रम सहभागितामा सकारात्मक परिवर्तन भएका छन् । आर्थिक समानताबिना सामाजिक तथा सांस्कृतिक विभेदको अन्त्य हुन सक्दैन ।
यसका लागि संविधानले मार्गदर्शन गरेको न्याय र समानतामा आधारित समाजवाद उन्मूख अर्थतन्त्र निर्माण गर्नुपर्ने आवश्यकतामा पनि जोड दिन चाहन्छु । जनसंख्याको आधा–आधा हिस्सामा रहेको महिला र पुरुष दुवै यस महान् कार्यमा संलग्न हुनु पर्दछ भन्ने मलाई लाग्दछ । मुलुकले हासिल गरेका हालसम्मका उपलब्धिहरूलाई रक्षा गर्दै लैङ्गिक उत्तरदायी शासन पद्धतिलाई स्थानीय तहदेखि नै संस्थागत गरी अगाडि बढेमा ‘समृद्ध नेपाल, सुखी नेपाली’ को साझा राष्ट्रिय आकाङ्क्क्षा पूरा गर्न सकिने कुरामा म विश्वस्त छु ।
सरकारले लैङ्गिक विभेदको अवस्थालाई अन्त्य गर्ने उद्देश्यका साथ राष्ट्रिय लैङ्गिक समानता नीति–२०७७ जारी गरेकोमा म खुशी व्यक्त गर्न चाहन्छु र यसका लागि नेपाल सरकारलाई धन्यवाद दिन चाहन्छु । वर्तमान संसद र संसदमा प्रतिनिधित्व गर्ने राजनीतिक दलहरु लैङ्गिक मैत्री छन् ।
यो नीतिको कार्यान्वयनबाट बालिका, किशोरी तथा महिलाप्रति हुने सबै किसिमका विभेद र हिंसाको न्यूनीकरण हुने अपेक्षा गरेको छु । परिवार र समाजमा छोरा र छोरी दुबै सन्तान समान हुन् भन्ने दृष्टिकोणलाई आत्मसात गर्दै अघि बढेको अवस्थामा नै वास्तवमा महिला समानता कायम हुने ठानेको छु । यसबाट महिलाप्रति हुने हिंसा र विभेद न्यूनीकरण हुँदै अन्ततः सिङ्गो समाज नै समतामूलक र सभ्य हुने भएकाले सम्बद्ध सबै पक्षले संवेदनशील बन्नु पर्दछ ।
तेजाब आक्रमण विरुद्ध साहसिक अभियान सञ्चालन गर्ने किशोरी मुस्कान खातुनलाई नेपाल सरकार सहित अन्तर्राष्ट्रिय संघ संस्थाले सम्मान गरेकोमा खुशी व्यक्त गर्दै बधाई दिन चाहन्छु ।
साथै हिंसामुक्त निर्माण गर्ने उहाँको अभियानको निरन्तरताको लागि शुभकामना व्यक्त गर्दछु । अन्त्यमा, यस दिवसले सामाजिक संरचना र सोचमा परिवर्तन गर्दै महिलाको सुरक्षा, सम्मान र लैङ्गिक समानतायुक्त समाज निर्माणमा अग्रसर रहन सबैलाई प्रेरणा मिलोस् भन्ने शुभकामना व्यक्त गर्दछु । धन्यवाद । २०७७ साल फागुन २४ गते सोमबार ।
