एजेन्सी । नितेश तिवारी चाँडै नै आफ्नो अर्को बिग बजेट प्रोजेक्ट ‘रामायण’ को छायांकन सुरु गर्दैछन् । पछिल्ला केही महिनामा रणवीर कपुर र साई पल्लवी अभिनित यस फिल्मको कास्टिङसँग सम्बन्धित धेरै समाचार बाहिर आएका छन् ।
अब एक रिपोर्टलाई विश्वास गर्ने हो भने, यो फिल्ममा हनुमानको भूमिकाका लागि सनी देओललाई अप्रोच गरिएको छ ।
फिल्मसँग सम्बन्धित स्रोतको विश्वास गर्ने हो भने सनी नितिशको यो फिल्ममा सहमत भए । उनी हनुमानको भूमिका निभाउन निकै उत्साहित छन् । सन् २०२४ को मे बाट सनीले यस फिल्मको पहिलो भागको सुटिङ सुरु गर्ने चर्चा छ । फिल्मको पहिलो भागमा सनीले अतिथि भूमिकामा मात्रै देखिने भएपनि दोस्रो र तेस्रो भागमा उनको पूर्ण उपस्थिति रहनेछ ।
यसअघि विभिषणको भूमिकाका लागि साउथका सुपरस्टार विजय सेतुपतिसँग निर्माताले छलफल गरिरहेको सुनिएको थियो । फिल्ममा कैकेयीको भूमिकामा लारा दत्तलाई छनोट गरिएको छ । यो फिल्ममा सनीका भाइ बबी देओल कुम्भकरणको भूमिकामा देखिने चर्चा पनि थियो । तर, पछि बबीको टोलीले यसलाई अफवाह नै भने ।
नितिशले मार्च २०२४ सम्ममा रणवीर र साईसँग यस फिल्मको पहिलो भागको सुटिङ सुरु गर्ने अपेक्षा गरिएको छ । फिल्ममा रावणको भूमिका निर्वाह गर्ने यश जुलाई २०२४ मा छायांकनमा जाँदैछन् । निर्माताहरूले यसको पहिलो भाग सन् २०२५ को दोस्रो भागमा रिलिज गर्ने योजना बनाएका छन् ।
