काठमाडौँ । नेपालका लागि चिनियाँ राजदूत चेन सोङले नारायणघाट–बुटवल सडक विस्तार आयोजनाको स्थलगत अबलोकन गर्नुभएको छ ।
चाइना स्टेट कन्स्ट्रक्सन इन्जिनियरिङ कर्पोरेसनले जिम्मा पाएको कामको गति सुस्त भएको भन्द आलोचना भएपछि राजदुत छन सोङले स्थलगत अबलोकन गर्नुभएको हो ।
अबलोकन पछि राजदूत सोङले विगत दश महिनामा नारायणघाट-बुटवल सडकको दोस्रो पटक भ्रमण गरेको जानकारी गराउदै धेरै बाधाहरू हटाएर परियोजना सुचारु रूपमा अगाडि बढेको देख्दा खुसी लागेको जनाउनु भएको छ ।
उहाँले चाइना स्टेट कन्स्ट्रक्सन इन्जिनियरिङ कम्पनीका सबै कर्मचारीहरूलाई तिनीहरूको कडा परिश्रमको लागि बधाई समेत दिनु भएको छ ।
सडक विस्तारमा विलम्ब हुँदा नागरिकले खेप्नु परेको सास्तीबारे सरकारको ध्यानाकर्षण गराउन रास्वपा सभापति एबं चितवन २ का सांसद समेत रहेनु भएका रवि लामिछाने सहितका नेता तथा कार्याकर्ता ले ९ पुसमा नारायणगढबाट पैदल यात्रा सुरु गरी ११ गते बुटवलमा पुगेर सकिएको थियो ।
यसैबीच २६ पुष गते सभापति लामिछाने र नेपालका लागि चिनियाँ राजदूत छन् सोङ्बीच भेटवार्ता भएको थियो । सो भेटघाटमा रास्वपाले सम्पन्न गरेको ३ दिने दबाब यात्रा (पूर्व(पश्चिम राजमार्गअन्तर्गत नारायणगढ) बुटवल सडक खण्डको स्तरोन्नतिमा भइरहेको विलम्ब र अहिले यात्रा क्रममा नागरिकले खेप्नु परेको सास्तीबारे कुराकानी भएको थियो ।
भेटमा निर्माणमा ढिलाइ हुनुको विविध कारणबारे छलफल भएको जनाईएको छ। थप ढिलाइ नहुन चलिनु पर्ने कदम र निर्वाह गरिनुपर्ने भूमिकाबारे विस्तृत कुराकानी भएको र आयोजना छिटो सम्पन्न गर्न आफ्नो तर्फबाट आवश्यक पहल गर्ने राजदूत सोङले प्रतिबद्धता जनाउनु भएको रास्वपाले जनाएको छ ।
अहिलेसम्म ४३ प्रतिशत मात्रै काम सकिएकाले यो आयोजनाको काम सकिन अझै कम्तीमा ३ वर्ष लाग्ने अनुमान सडक विभागकै छ । करिब रु १७ अर्ब लागतको यो परियोजना एसियाली विकास बैंक एडिबीको ऋण सहयोगमा अघि बढाइएको हो । रासस
