काठमाडौँ । अर्जेन्टिनी स्टार फुटबलर लियोनल मेसी फिफाको उत्कृष्ट खेलाडी २०२३ चुनिएका छन् । मेसीले फिफाको उत्कृष्ट पुरुष खेलाडीको अवार्ड जितेको यो तेस्रो पल्ट हो ।
यस फिफा ‘द वेस्ट’ अवार्डमा फिफा राष्ट्रका सदस्य देशहरूका कप्तान, प्रशिक्षक र पत्रकारले भोट गर्ने प्रावधान छ । यसै प्रावधान अनुसार विश्वभरका भोटका आधारमा मेसी ‘फिफा द वेस्ट’ प्लेयर बनेका हुन् ।
नेपालबाट भोटिङको अधिकार पाएका प्रशिक्षक भिन्सेन्जो अल्बर्टो एनेसले भने मेसीलाई शीर्ष तीनमा भोट दिएनन् । एनेसले पहिलो नम्बरमा अर्लिङ हालान्डलाई भोट दिँदा, दोस्रोमा खभिचा कभरात्सखेलिया र तेस्रोमा केभिन डी ब्रुएनालाई भोटिङ गरे ।
यस्तै, कप्तान किरण लिम्बुले मेसीलाई पहिलो नम्बरमा भोटिङ गर्दा केलियन एम्बाप्पेलाई दोस्रो र हालान्डलाई तेस्रो नम्बरमा राखे ।
पत्रकारको तर्फबाट गोल नेपाल डटकमा सञ्चालक विक्रम थापाले भोटिङ गरेका थिए । उनले अर्लिङ हालान्डलाई पहिलो नम्बरमा राख्दा युलियन अल्भारेजलाई दोस्रो तथा मेसीलाई तेस्रो नम्बरमा राखे ।
