काठमाडौ । एक अर्का बिरुद्ध गाली गलौज र आरोप प्रत्यारोपको कुनै शब्द नै बाकि नराखेका नेकपा एमालेका नेताहरु ४ महिना पछि पार्टी मुख्यालय धुम्बाराहीमा पुगे । एकै पार्टीका दुई नेताहरु बीच भएको छलफल अन्य कुनै दुई पार्टी बीच भएको छलफल जस्तो देखिएको थियो ।
आईतबार एक टेलिभिजनलाई अन्तरवार्ता दिँदै प्रधानमन्त्री केपी शर्मा ओलीले अर्का नेता माधव नेपाल प्रति कटाक्ष गरेपनि साँझ नेता माधव नेपाललाई छलफलका लागि आमन्त्रण गर्नु भएको थियो । पुस ४ गते बालुवाटारमा पाइलो नहाल्नु भएका नेता नेपालले सम्वादका लागि सहमति जनाउँदै पार्टी कार्यालयमा नै भेट्ने बताएपछि आफ्ना स्थायी सहयोगी बोकेर दुबै पक्ष धुम्बाराही पुगेका थिए । बैठकको सुरुमा अध्यक्ष ओलीले पुष्पकमल दाहाल प्रचण्डसँग मिलेर आफूलाई सिध्याउन खोजे पनि सर्बोच्च अदालतको फैसलाले राजनीतिक जीवन जोगिएको भन्दै गल्तीको रियलाइजेसन गर्न आग्रह गर्नुभएको थियो । उहाँले पुराना सबै कुरा कोट्याएर बदला लिने सोच आफूमा नरहेको स्पष्ट पार्नु भएको थियो ।
छलफलमा सहभागी एक नेताका अनुसार प्रधानमन्त्री ओलीले भन्नुभयो, ‘तपाईंहरूले त सक्ने भए मलाई के बाँकी राख्नुहुन्थ्यो ? एउटा बच्चालाई लगेर ढुंगामा बजारेको जसरी तपाईंहरूले केही बाँकी राख्नु भएन । आफ्नै अध्यक्षलाई चार–चार पटक निष्कासनको घोषणा गर्ने देखि, फौजदारी अभियोगसम्म लगाउनु भयो । अब विगततिर धेरै नजाउँ, अदालतको फैसलाबाट नयाँ ठाउँमा पुगिएको छ त्यही अनुसार अघि बढौं ।
अन्य समयमा भन्दा निकै नरम रुपमा प्रस्तुत हुनु भएका प्रधानमन्त्री ओलीले कुराहरु राख्दै गर्दा नेता नेपालले पटक पटक आपत्ति जनाउनु भएको थियो । प्रधानमन्त्रीले सर्वाेच्चकाे फैसला पछिको बैठकमा किन नआउनु भएको भन्दै प्रश्न राखेपछि नेपालले प्रतिवाद गर्दै भन्नुभयो – त्यो तपाईहरुकाे गुटभेला हो बैठक होइन, बैठक मानिदैन, नयाँ परिस्थितिमा एमालेको माहाधिवेशनले दिएको म्याण्डेट भन्दा एक इन्च पनि दायाँ बायाँ हुँदैन ।
माधव नेपालले घारणा राख्दा गम्भीरतापूर्बक सुन्नु भएका प्रधानमन्त्री ओलीले २८ गतेको निर्णयलाई मानेर जाऔँ, बैठकबारे कुनै असहमति भए ७ गतेको बैठकमा उपस्थित भएर कुरा राख्न आग्रह गर्नुभयो । प्रधानमन्त्री ओलीले ४ र ५ गतेको राष्ट्रिय भेला रोक्न आग्रह गरेपछि नेता नेपालले भन्नुभयो, ‘सल्लाह गरौं, चैत्र ३ गतेको चियापान स्थगित गर्नुहोस्, ७ गतेको बैठक पनि स्थगित गर्नुहोस्, थप सल्लाह गरेर मात्र केन्द्रीय कमिटीको बैठकको निम्ति अर्को मिति तोकौं, अन्यथा मान्न सकिन्न ।
२८ गते बसेको भनिएको केन्द्रीय समितिको बैठकले पूर्व माओवादीका नेताहरु रामबहादुर थापा सहित २३ जनालाई केन्द्रीय सदस्यमा मनोनित गर्दै विभिन्न जिम्मेवारी दिइएको थियो । माधव नेपाल केही आक्रामक रुपमा प्रस्तुत भएपनि उहाँ पक्षका नेताहरु संयमित देखिएका थिए ।
एमाले विभाजन हुन नहुने भन्दै नयाँ शिराबाट छलफल गरी निचोडमा पुग्नु पर्ने पक्षमा देखिएको एक नेताले जानकारी दिए । दुबै पक्ष आफूले आयोजना गरेका कार्यक्रम नरोक्ने मनस्थितिमा पुगेपछि दुबै कार्यक्रमहरु गर्ने तयारीमा जुटेका छन् । यद्यपी धुम्बाराही बैठक सकिएर बाहिरिएका दुबै पक्षका केही दोश्रो तहका नेताहरु पुन : छलफलमा भने जुटेका छन् । नेपाल पक्षले धुम्बाराहीमा भएको छलफल बारे जानकारी गराउन बानेश्वरको अर्याल होटलमा नेताहरुलाई बोलाएका छन् ।
