काठमाडौं । विभिन्न १३ देशका लागि सरकारले सिफारिस गरेका राजदूतहरूको संसदीय सुनुवाइ प्रक्रिया बुधबार सकिएको छ। बुधबार अन्तिम चार जनाको सुनुवाइ सम्पन्न भएसँगै संसदीय सुनुवाइ समितिले प्रस्तावित सबै राजदूतको सुनुवाइ पूरा गरेको हो।
सुनुवाइ सकिएपछि समितिका सदस्यहरू प्रस्तावित राजदूतहरूको नाम अनुमोदन गर्ने वा नगर्ने विषयमा आन्तरिक छलफलमा जुटेका छन्। छलफलपछि बुधबार नै समितिको बैठक बसेर निर्णय गर्ने तयारी रहेको छ।
गत असोज २ गते बसेको मन्त्रिपरिषद् बैठकले भारत, चीन, अमेरिका, बेलायत, जर्मनी, इजरायल, स्पेन, जापान, ओमान, मलेसिया, दक्षिण कोरिया, श्रीलंका र साउदी अरेबियाका लागि राजदूत सिफारिस गरेको थियो।सरकारले भारतका लागि डा. निश्चलनाथ पाण्डे, चीनका लागि डा. कल्याणराज शर्मा, अमेरिकाका लागि चिरनजंग थापा, बेलायतका लागि गौरवशमशेर जंगबहादुर राणा र जर्मनीका लागि सरू जोशीलाई सिफारिस गरेको छ।
त्यस्तै, इजरायलका लागि सुरेशकुमार कर्ण, स्पेनका लागि प्राप्ति शेरचन, जापानका लागि जिज्ञानकुमार थापा, ओमानका लागि डा. पदमाक्षी राणा, मलेसियाका लागि चूडामणि खरेल, दक्षिण कोरियाका लागि प्रा.डा. संगम श्रेष्ठ, श्रीलंकाका लागि डा. मञ्चलाकुमारी झा र साउदी अरेबियाका लागि गिरीबहादुर सुनारलाई राजदूतमा सिफारिस गरिएको छ।
सोमबारदेखि निरन्तर सञ्चालन भएको संसदीय सुनुवाइका क्रममा केही प्रस्तावित राजदूतको नैतिक आचरणमाथि सांसदहरूले प्रश्न उठाएका थिए। साउदी अरेबियाका लागि प्रस्तावित गिरीबहादुर सुनार, जापानका लागि प्रस्तावित जिज्ञानकुमार थापा र मलेसियाका लागि प्रस्तावित चूडामणि खरेलका विषयमा सांसदहरूले प्रश्न उठाएका हुन्।
यद्यपि, उनीहरूको नाम अनुमोदन गर्ने वा नगर्ने भन्ने विषयमा समितिले औपचारिक निर्णय गरिसकेको छैन। समितिको निर्णयपछि प्रस्तावित राजदूतहरूको नियुक्ति प्रक्रिया थप अघि बढ्नेछ।
