तनहुँ । तनहुँको भिमादमा पहिलो पटक पानी फ्याक्ट्री सञ्चालनमा आएको छ । भिमाद बजारबाट नजिकै अवस्थित म्याग्दे गाउँपालिका-५ छाङ्गपाटनमा पानी फ्याक्ट्री ‘साथी २४इन्टु७’ सञ्चालनमा आएको हो ।
छाङ्गपाटनका स्थानीय विष्णु भक्त खनालले उक्त पानी फ्याक्ट्री सञ्चालनमा ल्याएका हुन् । भारतीय सेनाबाट सेवानिवृत्त आएर रोजगारीका सिलसिलामै दुई वर्ष दुबईको अबुधावीमा काम गरेर खनाल देशमै केही गर्नुपर्छ भनी नेपाल फर्किए ।
सामाजिक अभियन्ता भएर हिँडेका खनालले भाषण गरेर मात्र नहुने आर्थिक पाटो पनि अपरिहार्य हुने भन्ने कुरा बुझे । त्यसपछि २३ रोपनि जग्गामा बैंकमा धितो राखेर उनले फ्याक्ट्री खोलेको बताए । उनले भने ‘पानीको ल्याब परीक्षण गर्न साथीसँग तम्सुक लेखाएर, ३ रुपैयाँ व्याजमा ऋण लिएँ । संरचना निर्माणका लागि मात्रै नौ महिना लाग्यो ।’
२४ घण्टामा २ हजार जार पानी उत्पादन गर्न सक्ने दाबी गर्दै खनालले विशेषगरी भिमाद, दुलेगौंडा, खैरेनीटार र दमौलीसम्म पानी उपलब्ध गराइने बताए । आफ्नो पुख्र्यौली जग्गामा फ्याक्ट्री खोलेका उनले बोरिङदेखि लिएर आउँदा डेढ करोड लगानि गरिसकेको बताए ।
उनी भन्छन् ‘१७ वर्ष भारतीय सेनामा जागिर गरेँ । देश विदेश पनि गएँ । जहाँ गएपनि नेपालीले भोग्नुपरेको पिडाँ देखेर भावुक हुन्थेँ । अबको बाँकी जीवनमा केही गर्नुपर्छ भनेर यो पानी फ्याक्ट्री खोल्नु मेरो लक्ष्य नै थियो । एउटा ब्राण्डको स्थापना गरौँ । घाटा नाफा, सफल, विफल भन्ने भविष्यमा देखिएला । एक कृषकको छोरोले साहस लिएको छ । स्वच्छ छविले पानी फ्याक्ट्री सञ्चालनमा आएको १५ दिन भएको छैन मैले सुलभ मूल्यमा पानी उपलब्ध गराइरहेको छु । त्यसकारण म धन्यवादको पात्र छु ।’
उद्यमी खनालले दुई वर्षसम्म एक वटा २० लिटर जारको मूल्य ४५ रुपैयाँ नै कायम रहने बताउँदै दुई वर्षपछि ५० बनाइने जानकारी दिए । पाँच वटा भन्दा बढी जारको पानी किन्नेलाई उनले ३५ रुपैयाँमा पानी उपलब्ध गराउँदै आएको पनि बताए ।
बढ्दै गरेको विश्व बजारको चरम आर्थिक मन्दी र दैनिक अवसरको खोजीमा युवाहरु विदेश पलायन पद्दती र आम नागरिकका स्वास्थ्यलाई ख्याल राख्दै समाजमा सकरात्मक सन्देश प्रवाह गर्ने हेतुले फ्याक्ट्री सञ्चालनमा ल्याइएको बताए । यसबाट भिमाद आसपासका मानिसले स्वच्छ र स्वस्थ पानी पिउन पाउनुका साथै स्थानीय युवाहरुले पनि रोजगारीको अवसर प्राप्त गर्ने उनको भनाई छ ।
