न्यूजिल्याण्डले पाँच खेलको टी-२० शृंखला शानदार जितका साथ सुरु गरेको छ । केन विलियम्सनको कप्तानीमा रहेको किवी टोलीले पहिलो टी–२० खेलमा पाकिस्तानलाई ४६ रनले पराजित गर्यो । ब्याटिङमा डेरिल मिचेल र बलमा टिम साउथीले जित दिलाए ।
साउथीले आफ्नो पेस र स्विङले पाकिस्तानी ब्याट्सम्यानलाई तहसनहस बनाए । साउथीले मात्र २५ रन दिएर चार विकेट लिए । साउथीले यस खेलमा यस्तो उपलब्धि हासिल गरे, जुन अहिलेसम्म कुनै बलरले गर्न सकेका छैनन् ।
टिम साउथी टी–२० अन्तर्राष्ट्रिय क्रिकेटमा १५० विकेट लिने विश्वकै पहिलो बलर बनेका छन् । पाकिस्तानविरुद्धको पहिलो टी–२० खेलमा साउदीले उत्कृष्ट बलिङ गर्दै चार विकेट लिएको थियो । साउदीले मोहम्मद रिजवानलाई आफ्नो पहिलो शिकार बनाए । त्यसपछि किवीका अनुभवी बलर इफ्तिखार अहमदलाई प्याभिलियनको बाटो देखाए । अन्तिम ओभरमा साउदीले अब्बास अफ्रिदी र ह्यारिस रउफलाई आउट गरेको थियो ।
टिम साउथी अन्तर्राष्ट्रिय क्रिकेटमा तीनवटै फर्म्याटमा १५० विकेट लिने पहिलो बलर पनि हुन् । टी–२० क्रिकेटमा सर्वाधिक विकेट लिनेमा साकिब अल हसनको नाम साउथीपछि दोस्रो स्थानमा छ । शाकिबले क्रिकेटको छोटो फर्म्याटमा १४० विकेट लिएका छन् । यो सूचिमा तेस्रो स्थानमा राशिद खान छन्, जसले १३० विकेट लिएका छन् ।
२२७ रनको लक्ष्य पछ्याएको पाकिस्तानको सम्पूर्ण टिम १८० रन बनाएर अलआउट भएको थियो । टोलीका तर्फबाट पूर्व कप्तान बाबर आजमले सर्वाधिक ५७ रन बनाए । बाबरले आफ्नो ५७ रनको इनिङ्समा ६ चौका र २ छक्का प्रहार गरे । तर बाबर बाहेक टोलीका कुनै पनि ब्याट्सम्यान क्रिजमा बसेर खेल्न सकेनन् ।
यसअघि टस जितेर ब्याटिङ गरेको न्यूजिल्याण्डले २० ओभरमा ८ विकेट गुमाएर २२६ रन बनाएको थियो । टोलीका तर्फबाट डेरिल मिचेलले उत्कृष्ट ब्याटिङ गर्दै २७ बलमा ६१ रनको विस्फोटक इनिङ खेले भने केन विलियम्सनले ४२ बलमा ५७ रन बनाए । यो जितसँगै किवी टोलीले सिरिजमा १–० को अग्रता बनाएको छ ।
