![](https://newspolar.com/wp-content/uploads/2024/01/FINAL.00_19_46_23.Still038.jpg)
काठमाडौँ । सत्तारुढ दल नेकपा(एकीकृत समाजवादी)ले पार्टीको विधान संशोधनका लागि पार्टीका तल्ला कमिटीहरुबाट सुझाव लिने भएको छ ।
एकीकृत समाजवादीको बुधवार बसेको सचिवालय बैठकले पार्टीको विधान संशोधनका लागि पार्टीका तल्ला कमिटीहरु र कार्यकर्ताहरुबाट सुझाव संकलन गर्ने निर्णय गरेको हो । त्यसका लागि गत केन्द्रिय कमिटीको बैठकमा प्राप्त भएको सुझावका आधारमा बनेको विधान मस्यौदा प्रश्तावलाई जिल्लासम्म पठाउने र त्यसैको आधारमा सुझाव लिने प्रवक्ता जगन्नाथ खतिवडाले जानकारी दिनुभयो । जिल्लाबाट प्राप्त सुझावका आधारमा पुनः अर्को विधान मस्यौदा बनाएर आगामी माघको १४ र १५ गते बस्ने केन्द्रीय परिषद्को बैठकमा प्रश्तुत गरिने उहाँले जानकारी दिनुभयो ।
बैठकको निर्णय सुनाउँदै उहाँले भन्नुभयो – ‘आगामी माघ ११ गते हुने राष्ट्रिय सभा निर्वाचनमा पार्टीका सम्पूर्ण शक्तिलाई यसैमा केन्द्रित हुन, व्यवस्थापन गर्न, प्रचार गर्न र गठबन्धनका उम्मेदवारहरुलाई जिताउनको निम्ति पार्टीले आव्हान गर्ने निर्णय गरेको छ । माघको १४ र १५ मा पार्टीको केन्द्रिय परिषद्को बैठक बस्दैछौँ । त्यसमा पार्टीको विधान संशोधनका विषयमा छलफल हुनेछ । त्यसका लागि गएको केन्द्रिय कमिटीको बैठकले जे सुझाव संकलन गरेको थियो, संकलन गरेको सुझाव र त्यसका आधारमा एउटा मस्यौदा प्रस्ताव बनाएर ति बुँदाहरु हामीले तल पठाउने निर्णय गरेका छौँ । भोलिदेखि जिल्लाका कार्यकर्ताहरुमा यो पुग्नेछ । कमिटीहरुमा पुग्नेछ । उहाँहरुले सुझाव दिनुहुनेछ । त्यो सुझावको आधारमा हामी फेरि अर्को मस्यौदा प्रश्ताव बनाएर १४, १५ को केन्द्रिय परिषद्को बैठकमा प्रश्तुत गर्नेछौँ ।’
बैठकले आगामी माघ ११ गते हुने राष्ट्रिय सभा निर्वाचनमा पार्टीका सम्पूर्ण शक्तिलाई केन्द्रित गराउने निर्णय पनि गरेको छ । निर्वाचनको व्यवस्थापन, प्रचार र गठबन्धनका उम्मेदवारहरुलाई जिताउनको निम्ति आह्वान गर्ने निर्णय पनि गरेको प्रवक्ता खतिवडाले जानकारी दिनुभयो ।