काठमाडौं । राष्ट्रिय प्रजातन्त्र पार्टी(राप्रपा)ले साम्प्रदायिक विद्वेष फैलाउने संस्कृति, पर्यटन तथा नागरिक उड्डयनमन्त्री सुदन किराँतीलाई कानुन वमोजिम कार्वाही गर्न माग गरेको छ ।
राप्रपा प्रवक्ता एवं प्रचार विभाग प्रमुख मोहन श्रेष्ठले किरातीलाई पदमुक्त गराउन प्रधानमन्त्री र सत्तागठबन्धनको ध्यानाकर्षण समेत गराउनु भएको छ ।
श्रेष्ठले सामाजिक संञ्जालमा लेख्नुभएको छ-
मन्त्री पदमा रहेर ‘कृश्चियन धर्म नमान्नेलाई जेलमा कोच्ने’ जस्तो बहुलठ्ठीपूर्ण अभिव्यक्ति दिने, हिन्दु धर्म, हिन्दु संवेदनामाथि अशोभनीय र अमर्यादित टिप्पणी गर्ने प्रचण्ड सरकारका मन्त्री सुदन किरॅाती बर्खास्तका योग्य छन्।
यस्तो व्यक्ति ८१% हिन्दु र ९४% ओमकार परिवार भएको देशमा कसरी संस्कृतिमन्त्रीको रुपमा स्विकार्य हुनसक्छ ? निजलाई पदमुक्त गराउन प्रधानमन्त्री र सत्तागठबन्धनको ध्यानाकर्षण गराउॅदछौं। साथै, सामाजिक सदभाव बिथोल्ने, साम्प्रदायिक विद्वेष फैलाउने निजलाई कानुन वमोजिम कार्वाही गरियोस् ।
बुधवार राजधानीमा आयोजना भएको उपत्यकाव्यापी संयुक्त बृहत् ख्रीष्टमस महोत्सव २०८० लाई सम्बोधन गर्दै मन्त्री किराँतीले भन्नुभएको थियो -राज्यका आँखामा सबै धर्म बराबरी हुन् । आज तीन करोड नेपालीमा लाखौँ क्रिस्चियनहरु भइसकेका छन् । क्रिस्चियनलाई मान्दिन भन्नु संविधानलाई मान्दिनँ भन्नु हो, संविधान मान्दिनँ भन्ने देशद्रोही हुन् । यदि कसैले देशद्रोह गर्छ भने त्यसलाई हतकडी लगाउने जेलमा हालिदिने हो ।
मन्त्री किरातीको अभिव्यक्तिको सर्बत्र आलोचना भएको छ ।
