काठमाडौं । प्रधानमन्त्री पुष्पकमल दाहाल ‘प्रचण्ड’ले आफ्नी छोरीमाथि भएको आक्रमण व्यवस्थामाथिकै हमला भएकोबताउनु भएको छ ।
एनसेल बिक्री प्रकरणमा जबाफ दिन राज्य व्यवस्था समितिको मंगलबारको बैठकमा प्रधानमन्त्री दाहालले छोरीमाथि भएको आक्रमण लोकतान्त्रिक व्यवस्थाविरुद्धको हमला भएको बताउनु भयो ।
बैठकमा उहाँले भन्नुभयो -मेरो परिवारमा अब तीन जना सदस्यमात्रै बाकी छन् । एउटा छोरी रेणु दाहाल चितवन महानगरपालिकाको मेयर छन् । अर्को छोरी मेरो सचिवालयमा काम गरिरहेको छ । त्यो बिचरा कस्तो छ, सबैलाई नै थाहा छ । उसलाई जोडेर कहिले उचालिएको छ, कहिले पछारिएको छ । यो लोकतान्त्रिक व्यवस्थाविरुद्धको हमला हो । प्रचण्डलाई हमला गरेर नपछारेसम्म यो व्यवस्था उल्टिँदैन भनेर मेरोविरुद्ध लागिपरेका छन् । केलाई चलाएर के भने जस्तो, मैले किन चलाउनु ? मलाई थाहा छ, चुप लागेको हो । यहा समितिमा प्रश्न उठेकोले जवाफ दिएको हो ।
पछिल्ला समयमा बिभिन्न प्रकरणमा प्रधानमन्त्रीका परिबारका सदस्यको संग्लनता रहेको भन्दै आलोचना भै रहेको छ ।
