एजेन्सी । अन्डरवर्ल्ड डन दाउद इब्राहिम कराँचीको अस्पतालमा भर्ना भएका छन् । मिडिया रिपोर्टले उनलाई विष खुवाइएको आशंका बताएको छ । तर, यसको आधिकारिक पुष्टि भने भइसकेको छैन । उनी २ दिनदेखि अस्पतालमा भर्ना छन् । उनलाई कडा सुरक्षामा राखिएको छ ।
इन्डिया टुडेको रिपोर्टका अनुसार अस्पतालमा दाउदलाई राखिएको फ्लोरमा अन्य कुनै बिरामी छैनन् । उनको परिवारका सदस्यहरू मात्र त्यहाँ जान सक्छन् । मुम्बई प्रहरीले पनि यस विषयमा निगरानी गरिरहेको छ । मुम्बईमा रहेका दाउदका आफन्तहरूबाट जानकारी सङ्कलन गर्ने प्रयास भइरहेको छ ।
भारतीय सञ्चारमाध्यम दैनिक भाष्करका अनुसार केन्द्रीय अनुसन्धान एजेन्सीका एक अधिकारीले दाउदलाई विष खुवाइएको खबर धेरै हदसम्म अफवाह हुनसक्ने बताएका छन् । दाउदको सुरक्षा यति बलियो छ कि कुनै पनि व्यक्तिलाई उनीसम्म पुग्न कम्तिमा १५० मानिस पार गर्नुपर्ने हुन्छ ।
दाउद इब्राहिम भारतको मोस्ट वान्टेड आतंकवादी हुन्, एनआईएले गत वर्ष पुरस्कार रकमको सूची जारी गरेको थियो। यसमा दाउदमाथि २५ लाख रुपैयाँ इनाम राखिएको छ । संयुक्त राष्ट्र संघले पनि दाउदलाई विश्वव्यापी आतंकवादी घोषणा गरेको छ । संयुक्त राष्ट्र सुरक्षा परिषद्ले सन् २००३ मा दाउद इब्राहिममाथि २५ मिलियन डलरको इनाम राखेको थियो ।
उनीविरुद्ध विभिन्न राष्ट्रिय एजेन्सीहरूले सम्पत्ति शुद्धीकरण मुद्दा र हतियार तस्करी मुद्दालगायत थुप्रै मुद्दा दायर गरेका छन् । उनले सन् १९७० मा सिन्डिकेट डी-कम्पनी गठन गरे ।
दाउद इब्राहिममाथि सन् १९९३ मा मुम्बईमा बम विस्फोट गराएको आरोप पनि छ । यसमा २५७ जनाको ज्यान गएको थियो भने ७०० जना घाइते भएका थिए ।
उनीमाथि हत्या, जबरजस्ती असुली, टारगेट किलिंग, लागुऔषध ओसारपसारको आरोप पनि छ । उनी हाल पाकिस्तानको कराँचीमा बस्दै आएको बताइएको छ तर पाकिस्तान सरकारले यसलाई अस्वीकार गर्दै आएको छ ।
जनवरीमा दाउदकी बहिनी हसिना पार्करले पाकिस्तानी मिडिया हाउस द न्यूज इन्टरनेशनललाई दाउद कराचीमा रहेको र दोस्रो पटक विवाह गरेको बताएकी थिइन् ।
अन्डरवर्ल्ड डन दाउद इब्राहिमको जन्म २७ डिसेम्बर १९५५ मा महाराष्ट्रको रत्नागिरीमा भएको थियो । उनका तीन छोराछोरी, (दुई छारी र एक छोरा) छन् । दाउद इब्राहिमकी पत्नी जुबिना जरिनलाई मेहजबीन शेख भनेर चिनिन्छ । दाउदको बाल्यकाल मुम्बईमा बित्यो । दाउदका बुबाका भाइ सलीम कश्मीरी अझै पनि यही क्षेत्रमा बस्छन् ।
