काठमाडौँ । अघिल्लो वर्ष डिसेम्बर १८ (आजकै दिन) मा कतारको लुसेल रंगशालामा भएको फिफा विश्वकपको फाइनलमा अर्जेन्टिनाले फ्रान्सलाई स्तब्ध पार्दै विश्वकपको उपाधि जित्यो ।
दुबै टिमले त्यसअघि दुई-दुई पटक विश्वकपको उपाधि जितेका थिए । अर्जेन्टिनाका कप्तान लियोनल मेसी र फरवार्ड एंगेल डि मारियाको गोलबाट अर्जेन्टिनाले अग्रता दोब्बर पारेको थियो । ७० मिनेटसम्म पनि खेल अर्जेन्टिनाकै पक्षमा थियो ।
तर, ७१ औं मिनेटमा फ्रान्सका स्टार फरवार्ड किलियन एमबाप्पेले पेनाल्टीमा गोल गर्दै फ्रान्सलाई खेलमा फर्काए । त्यसको दुई मिनेटको अन्तरालमै एमबाप्पेले दोस्रो गोल थप्दै फ्रान्सलाई २-२ गोलको बराबरीमा ल्याए । त्यसपछि खेलले एकाएक अर्को मोड लियो ।
निर्धारित समयसम्म खेल २-२ को बराबरीमा गएपछि खेल अतिरिक्त समयतर्फ धकेलियो । खेलको १०८ औं मिनेटमा मेसीले व्यक्तिगत दोस्रो गोल गर्दै पुनः अर्जेन्टिनालाई अग्रता दिलाए । तर, ११५ औं मिनेटमा फ्रान्सले पेनाल्टी पायो । एमबाप्पेले उक्त अवसर खेर जान दिएनन् र गोल गर्दै विश्वकप फाइनलमा ह्याट्रिक गर्ने दोस्रो खेलाडी बने ।
यसरी ३-३ गोलको बराबरी भएपछि विजेताको टुंगो पेनाल्टी सुटआउटबाट लाग्ने भयो । पेनाल्टी सुटआउटमा अर्जेन्टिना विजयी बन्दै १९८६ पछि तेस्रोपटक विश्वकपको उपाधि जित्यो ।
अर्जेन्टिनाले विश्वकप जित्नुमा प्रमुख खेलाडी थिए कप्तान मेसी । उनकै प्रदर्शनमा अर्जेन्टिनाले तेस्रोपटक उपाधि उचाल्यो । उनले प्रतियोगितामा सात गोल गरे । उनीभन्दा अघि एमबाप्पेले मात्रै आठ गोल गरेका थिए ।
उनी प्रतियोगिताकै उत्कृष्ट खेलाडी घोषित भएर ‘गोल्डेन बल’ समेत जिते । क्लब फुटबलमा सर्वाधिक सफल मेसीलाई देशका लागि विश्वकपको उपाधि जिताउनु थियो । जुन उनले एक वर्षअघि आजकै दिन पूरा गरे । जसअनुरुप उनी सर्वकालीन महान फुटबलर बने ।
