एजेन्सी । हरेक देशमा अपराध गरेमा सजायको व्यवस्था छ, अदालतले सम्पूर्ण मुद्दालाई ध्यानमा राखी अपराधको आधारमा सजाय निर्धारण गर्छ ।
तर यो सजाय मानिसका लागि हो, जनावरलाई पनि सजायको व्यवस्था छ भने के हुन्छ ? यस्तै घटना बंगलादेशमा भएको छ जहाँ नौवटा बाख्रालाई एउटा अपराधमा जेल सजाय दिइएको छ र त्यो पनि एक–दुई महिनाको लागि होइन वर्षभरको लागि । यो अचम्मको घटना अहिले चर्चाको विषय बनेको छ ।
मानिसलाई अपराधको सजाय दिइन्छ भन्ने कुरा तपाइले सुन्नु भएको होला तर जनावरलाई सजाय दिने यो घटनाले तपाईलाई पनि अचम्ममा पार्नेछ । बाख्राले के गर्यो कि एक वर्ष जेल बस्नुपर्यो ?
बंगलादेशको यो घटनाले सामाजिक सञ्जालमा निकै चर्चा पाइरहेको छ । स्थानीय सञ्चारमाध्यमका अनुसार बंगलादेशको बारिशाल सहरको एउटा चिहानमा घाँस र रुखको पात खाएकोमा नौ बाख्रालाई सजाय सुनाइएको छ । उनीहरु एक वर्ष जेलमा बिताएपछि नोभेम्बर २४ मा रिहा भएका थिए ।
बरिशाल महानगरपालिकाका नवनिर्वाचित मेयर अबुल खैर अब्दुल्लाको निर्देशनमा ती बाख्रालाई छाडिएको हो ।
यी बाख्राहरूलाई गत वर्ष डिसेम्बर ६ मा सहरको चिहानमा घाँस र रुखको पात खाएको आरोपमा पक्राउ गरी झण्डै एक वर्षसम्म बन्दी बनाएर राखिएको थियो । जेलबाट छुटेपछि बाख्रालाई मालिकलाई हस्तान्तरण गर्दा हाल बीसीसीका प्रशासकीय अधिकृत आलमगीर हुसेन र सडक निरीक्षक रियाजुल करीम र इमरान हुसेन खान उपस्थित थिए ।
कुनै अपराधमा जनावरलाई जेलमा परेको यो पहिलो घटना होइन । मिडिया रिपोर्टका अनुसार यसअघि अमेरिकाको मिशिगन प्रहरीले एक कुकुरलाई पक्राउ गरेको थियो । कुकुरलाई आफ्नो अफिसरको खाना चोरेको आरोप लगाइएको थियो । कुकुरले अनुसन्धानमा सहयोग नगरेको भन्दै प्रहरीले पक्राउ गरेको हो ।
