काठमाडौं । नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताइरीले प्रधानमन्त्री शेरबहादुर देउवासँग भेट गरेका छन् ।
उनले सामाजिक सञ्जालमार्फत शुक्रबार आफूसहित युवा तथा खेलकुदमन्त्री महेश्वरजंग गहतराज र नेपाली टोलीका व्यवस्थापक मधुसुदन उपाध्यायले प्रधानमन्त्रीसँग भेट गरेको जनाएका छन् ।
उनले बंगलादेशमा सम्पन्न सेन्ट्रल जोन भलिबल प्रतियोगिताको विजेता नेपाली महिला भलिबल टोलीलाई पनि भेटेको तस्बिर सार्वजनिक गरेका छन् । भेटमा प्रधानमन्त्री देउवाले अलमुताइरीलाई सम्मान पनि गरेका छन् । साफ च्याम्पियनसिपको फाइनल पुग्न सफल नेपाली टोलीका प्रशिक्षक अलमुताइरीलाई पनि सम्मान गरिएको हो ।
सरकारले फुटबल टोलीलाई यसअघि नै पुरस्कृत गरिसकेको थियो । तर, त्यतिबेला मुख्य प्रशिक्षक अलमुताइरी कतारमा थिए । त्यतिबेला छुटेका अलमुताइरीलाई सरकारले आज महिला भलिबल टिमसँगै सम्मान गरेको हो । फुटबलका खेलाडीलाई ५ लाख र प्रशिक्षकलाई ३ लाख नगदसहित सम्मान गरिएको थियो ।
अलमुताइरीको नेतृत्वमा घरेलु टोली नेपालले भर्खरै सम्पन्न मोरिससविरुद्धको दुबै मैत्रीपूर्ण खेलमा जित निकालेको थियो ।
