पोखरा । केपी ओली कप टी-२० क्रिकेट प्रतियोगितामा बागमती प्रदेशलाई ४ विकेटले हराउँदै त्रिभुवन आर्मी क्लब फाइनलमा प्रवेश गरेको छ ।
पहिलो सेमिफाईनल खेलमा बागमतीले दिएको १ सय २८ रनको लक्ष्य पछ्याएको आर्मीले १५ ओभरमा ६ विकेट गुमाएर पूरा गर्यो । आर्मीका लागि भीम सार्कीले सर्वाधिक ३९ रन बनाए। कुशल मल्लले ८ बलमा २७ रन बनाउदा विनोद भण्डारीले २५, सन्तोष कार्कीले ७, बसिर अहमदले ५ रन जोडे । सोमपाल कामी १५ र राजेश पुलामीमगर १ रनमा अविजित रहे ।
बलिङतर्फ बागमतीका कप्तान सन्दीप लामीछानेले २विकेट लिए । प्रतिश जिसी , इशान पाण्डे, रित गौतम र सोनु देवकोटाले समान १/१ विकेट लिए ।
यसअघि पोखरा रंगशालास्थित क्रिकेट मैदानमा टस जितेर पहिले ब्याटिङ रोजेको बागमतीले निर्धारित २० ओभरमा ७ विकेटकोे क्षतीमा १ सय २८ रन बनाएको थियो ।
बागमतीका लागी प्रतीक श्रेष्ठले अर्धशतकिय ईनिङ खेलेका थिए । उनले टीमको लागि सर्वाधिक ५० रन बनाएका थिए । कप्तान सन्दीप लामिछानेले १९, रित गौतमले १४, इशान पाण्डेले १२, सोनु देवकोटाले ९, शुभ कंशाकारले ३ र रोशन विकेले १ रन जोडेका थिए ।
बलिङतर्फ आर्मीका साहब आलमले ४ ओभरमा १ मेडनसहित १४ रन खर्चेर ४ विकेट लिए । सोमपाल कामी २ र विवेक यादवले १ विकेट लिएका थिए ।
आर्मीले अब उपाधिका लागि दोस्रो सेमिफाईनलको विजेतासँग खेल्नेछ । दोस्रो सेमिफाईनलमा आज मधेश प्रदेश र सशस्त्र प्रहरी बल (एपीएफ) भिड्दैछन् । फाइनल खेल शुक्रबार हुनेछ ।
