काठमाडौँ । काठमाडौँको तीनकुनेबाट प्रहरीले आज पक्राउ गरेका २०० जनालाई अहिले रिहा गरेको छ । मेडिकल व्यवसायी दुर्गा प्रसाई पक्षको प्रदर्शनका लागि जम्मा भएको भन्दै उनीहरुलाई प्रहरीले आज पक्राउ गरेको थियो ।
शुक्रबार पक्राउ परेका उनीहरुलाई अहिले केही बेर अगाडी रिहा गरिएको जिल्ला प्रहरी परिसर काठमाडौँका प्रवक्ता तथा प्रहरी उपरीक्षक कुमोध ढुंगेलले जानकारी दिए ।
जिल्ला प्रशासन कार्यालय काठमाडौँले तीनकुने क्षेत्रमा आन्दोलनका लागि प्रसाईलाई अनुमति नदिएको बताएपछि प्रहरीले उक्त क्षेत्रमा आज बिहादेखि प्रर्दशनका लागि जम्मा भएकाहरुलाई धमाधम पक्राउ गरेको थियो ।
शंकास्पद लागेका व्यक्तिहरुलाई मात्रै नियन्त्रणमा लिइएको प्रहरीले दाबी गरेको छ । दुर्गा प्रसाईलाई बिहीबार आन्दोलनका लागि प्रशासनले बल्खुस्थित त्रिवि परीक्षा नियन्त्रण कार्यालय नजिकै सडक तोकिदिएको थियो । प्रसाईले आन्दोलनलाई निरन्तरता दिन खोजेका छन् ।
बिहीबार तीनकुने क्षेत्रमा नेकपा (एमाले) का भ्रातृ संगठनहरु युवा संघ र अनेरास्ववियुले प्रदर्शन गरेका थिए । दुर्गा प्रसाईले भक्तपुरस्थित घरमा शुक्रबार बिहान पत्रकार सम्मेलन गर्दै आफूलाई आन्दोलनमा जान नदिइएको दाबी गरेका थिए ।
