काठमाडौ । नेपालस्थित अमेरिकी राजदूतावासले अमेरिकी राष्ट्रिय अपाङ्गता रोजगार सचेतना महिनाको सम्मानमा अपाङ्गता भएका व्यक्तिहरूका लागि विभिन्न कार्यक्रमहरू आयोजना गरेको छ।
उक्त कार्यक्रममा भिन्न रूपमा सक्षम युवाहरूको लागि रेज्युमे लेखन, अन्तर्वार्ता सीपहरू र अमेरिकी मिसनमा रोजगारीका अवसरहरूमा आवेदन दिनेसम्बन्धी जानकारी दिने कार्यशाला समावेश थियो। कार्यक्रममा राजदूत डिन थम्पसनले थप समावेशीताका लागि कार्यशक्ति विविधीकरणको महत्त्वमाथि पनि प्रकाश पार्नुभयो।
सो कार्यशालाको साथै दूतावासले अपाङ्गता भएका व्यक्तिहरूद्वारा निर्मित सामान तथा सेवाहरू प्रदर्शन तथा प्रवर्द्धन गर्ने मेलाको पनि आयोजना गरेको थियो।
अमेरिकी मिसन यी कार्यक्रमहरूमा विभिन्न स्थानीय संस्था र व्यक्तिहरूसँग सहकार्य गर्न र समान अवसर र विविधताको सम्मानप्रति मिसनको प्रतिबद्धतालाई अझ जोड दिन पाउँदा उत्साहित भएको दूतावासले जनाएको छ ।
