काठमाडौँ । आइसिसी टि२० विश्वकप एसिया क्षेत्र छनोटमा बहराइनले हङकङलाई २० रनले हराएको छ । यो हारसँगै हङकङको सेमिफाइनल सम्भावना कठिन बनेको छ ।
जितको लागि १ सय ४७ रनको लक्ष्य पाएको हङकङ १९.१ ओभरमा अलआउट हुँदै १ सय २६ रन बनायो । हङकङका अंशुमन रथले सर्वाधिक २८ रन बनाए । यस्तै, जिशान अलीले २१, एजिज खानले १९ र नस्रुला रानाले १६ रन जोडे । यी बाहेक हङकङका कुनैपनि खेलाडिले दोहोरो अंकमा रन बनाउन सकेनन् ।
बहराइनका अब्दुल मजिदले सर्वाधिक तीन विकेट लिए । यस्तै रिजवान बट र अली दाउदले समान दुई विकेट लिए ।
त्यसअघि माथिल्लो मुलपानी क्रिकेट मैदानमा टस हारेर पहिला ब्याटिङ गरेको बहराइनले १९.३ ओभरमा १ सय ४६ रनमा अल आउट भएको थियो । बहराइनको लागि इमरान अली बटले सर्वाधिक ६२ रनको योगदान दिएका थिए । यस्तै, इमरान जावेद १५, हैदर अली १४ र मोहम्मद रिजवान १३ रन बनाए । बहराइनका अन्य कुनै खेलाडिले दोहोरो अंकमा रन जोड्न सकेनन् ।
हङकङका लागि नस्रुला रानाले सर्वाधिक तीन विकेट लिए । एहसान खान,मोहम्मद अजिज खान र यासिम मुर्तजाले समान २ विकेट लिए ।
