काठमाडौँ । पूर्वराष्ट्रपति विद्यादेवी भण्डारीले आज काठमाडौँको बसुन्धारामा रहेको लिङ्ग भैरवीको मन्दिरमा पुगेर पुजा आराधना गर्नु भएको छ ।
नवरात्रको अवसर पारेर पूर्वराष्ट्रपति भण्डारीले लिङ्ग भैरवीमा पुगेर आज दिउँसो पुजा आराधना गर्नुका साथै आरती, अभिशेक समेत गर्नुभएको सो मन्दिरका अध्यक्ष अम्बिका श्रेष्ठले जानकारी दिनुभयो ।
उक्त मन्दिरमा अहिले नवरात्रको समयमा दैनिक एक हजारको सङ्ख्यामा भक्तजनहरुले पुजापाठ गर्नुका साथै आरती, अभिशेक गर्ने गरेका मन्दिर सञ्चालक समितिका सदस्य मनोजबहादुर श्रेष्ठले बताउनुभयो ।
उक्त मन्दिरमा नवरात्रको समयमा बिहान ७ बजे, दिउँसो १२ बजे र साँझ ७ बजे आरती तथा अभिशेक हुने गरेको छ । अहिले नवरात्रको समयमा पनि चीन, भियतनाम, रसिया, भारत, मङ्गोलिया, कम्बोडिया लगायतका देशहरुबाट पनि भक्तजनहरु दर्शन तथा पुजाआजाका लागि आउने गरेको मन्दिरका पुजारी स्वामी बज्र बालाले बताउनुभयो ।
भारतीय चर्चित गुरु जग्गी बसुदेवको अग्रसरतामा उक्त मन्दिर स्थापना भएको थियो । विगतमा लिंग भैरवीको कहीँ कतै चर्चा भए पनि भर्खरै स्थापित लिंग भैरवी सद्गुरूको परिकल्पनाको देवी हुन् । सनातन हिन्दु धर्मका तीन देवीहरू – लक्ष्मी, सरस्वती र दुर्गालाई त्रि-शक्ति मानेर उनले सिर्जना गरेको यी देवी उनको संस्था इशा फाउन्डेसनको अगुवाइमा निर्माण गरिएको हो ।
झट्ट हेर्दा शिवलिंगझैं लाग्ने तर एउटा शिलामा दुई आँखा, फुलीसहितको नाक बनाएर जग्गी बसुदेवले लिंग भैरवीको परिकल्पना गरेको बताइन्छ ।
