एजेन्सी । भारतीय प्रधानमन्त्री नरेन्द्र मोदी आज उत्तराखण्ड भ्रमणमा छन् । प्रधानमन्त्री मोदीले पिथौरागढको पार्वती कुण्डमा पूजा गरेका छन् । त्यसपछि मोदीले गुञ्जीमा रहेको रण समाजको स्टलमा परम्परागत वस्तु र उत्पादनहरुको अवलोकन गरेका छन् ।
साथै उनले परम्परागत बाजा ढोल बजाएका थिए । उनले स्थानीयहरुसँग हात मिलाएर अभिवादन गरे । प्रधानमन्त्रीले पिथौरागढमा करिब ४,२०० करोडको धेरै विकास परियोजनाहरूको उद्घाटन र शिलान्यास पनि गर्नेछन् ।
आजै प्रधानमन्त्री मोदी भारतको आध्यात्मिक भूमि आदि कैलाश पुगेका छन् । यहाँको शिव मन्दिरमा पूजाआजा गर्दै प्रधानमन्त्रीले आदिकैलाशको भव्य दर्शन गरी देशको सुख, समृद्धि र समृद्धिको कामना गरेका थिए ।
शिव धाम आदि कैलाश पुग्दा प्रधानमन्त्री मोदीलाई न्यानो स्वागत गरिएको थियो । सो क्रममा उत्तराखण्डका मुख्यमन्त्री पुष्कर सिंह धामी पनि उपस्थित थिए ।
निर्धारित कार्यक्रमअनुसार प्रधानमन्त्री मोदी आज बिहान ९ बजे पिथौरागढस्थित जिओलिङ्काङ हेलिप्याडमा हेलिकप्टरबाट अवतरण गरेका हुन् । यहाँबाट गाडीमा करिब डेढ किलोमिटरको दुरी काटेर हिमालयको चुचुरोमा रहेको पार्वती सरोवर र शिव मन्दिर पुगे । करिब २५ मिनेट भगवान शिवको पूजा र ध्यान गरे ।
त्यसपछि प्रधानमन्त्री मोदीले आदि कैलाश पर्वत र पार्वती सरोवरको पनि भ्रमण गरेका थिए । उनले आदि कैलाशलाई देखेपछि मन प्रसन्न भएको र जीवन धन्य भएको बताए । प्रधानमन्त्रीले उत्तराखण्ड भगवानको भूमि रहेको बताए ।
