आइसिसी विश्वकप क्रिकेट अन्तर्गत मंगलबारको दिवारात्रि खेलमा पाकिस्तानले श्रीलंकालाई सनसनीपूर्ण रुपमा छ विकेटले पराजित गरेको छ ।
भारतको हैदराबादमा भएको यस खेलमा श्रीलंकाले दिएको ३४५ रनको विशाल लक्ष पाकिस्तानले ४ विकेट गुमाएर १० बल बाँकी छँदै पूरा गरेर इतिहास रचेको थियो । यति ठूलो स्कोर डिफेन्ड गरेको विश्वकपकै इतिहासमा यो पहिलो हो ।
श्रीलंका लगातार दुई खेलमा पराजित भएको छ । यसअघि श्रीलंका न्युजील्यान्डसँग स्तब्ध भएको थियो ।
टस जितेर पहिले ब्याटिङ रोजेको श्रीलंकाका लागि कुशल मेन्डिसले आक्रामक १२२ तथा सदिरा समरविक्रमाले १०८ रन बनाएका थिए । यस्तै पथुम निसान्काले ५१, धनन्जय डा सिल्भाले २५ रनको योगदान गरे ।
पाकिस्तानी बलरहरु हसन अलिले ४, हारिस रौफले २, शाहिन शाह अफ्रिदी, मोहम्मद नबाज र शादाब खानले समान एकएक विकेट लिए ।
जितका लागि ३४५ रनको विशाल लक्ष पछ्याउने सम्भावना कमजोर रहेकै अवस्थामा पाकिस्तानका प्रारम्भिक ब्याट्सम्यान इमाम उल हक व्यक्तिगत १२ र अनुभवी कप्तान बाबर आजम १० रन बनाएर आउट भए ।
तर अर्का प्रारम्भिक ब्याट्सम्यान अब्दुल्लाहक शफिक र मध्यक्रमका खम्बा मोहम्मद रिज्वानले पाकिस्तानलाई विजयी लक्षसम्म डोर्याएका थिए । फखार जमानको स्थानमा खेल्ने मौका पाएका शफिकले ११३ रन बनाए भने रिज्वानले १३१ रन बनाए र उनी अन्तसम्म आउट भएनन्, र उनी प्लेयर अफ दी म्याच घोषित भए । रिज्वानले आफ्नो करिअरकै सबैभन्दा बढी रन बनाएका थिए ।
यस्तै साउद शकिलले ३१ तथा इफ्तिखार अहमदले अनटआउट २२ रन बनाए ।
श्रीलंकाका बलरहरु दिल्सान मधुसन्काले २, महिश थिक्साना र मथिसा पनिरानाले एकएक विकेट लिए । तर बलरहरुले २६ अतिरिक्त रन दिएका थिए भने फिल्डिङमा पनि कमजोरी देखिएको थियो ।
यो जितसँगै पाकिस्तान २ खेलबाट दुबै जित निकाल्दै चार अंक बनाएको छ, र लिग टेबलमा दोस्रो स्थानमा उक्लेको छ । पहिलो स्थानमा न्युजील्यान्ड छ, उसको पनि ४ अंक नै छ, तर रन रेटका आधारमा न्युजील्यान्ड अगाडि छ ।
बुधबार भारत र अफगानिस्तानबीच नयाँदिल्लीमा खेल हुनेछ ।
