एजेन्सी । चेन्नईको एमए चिदम्बरम क्रिकेट स्टेडियममा आईसीसी विश्वकप २०२३ मा अष्ट्रेलियासँग टिम इन्डिया भिड्दैछ । अष्ट्रेलियाले टस जितेर पहिले ब्याटिङ थालेको छ ।
भारतीय कप्तान रोहित शर्माले विश्वकपको पहिलो खेलमा मैदान उत्रनेबित्तिकै अनौठो कीर्तिमान बनाएका छन् ।
वास्तवमा, रोहित शर्मा ५० ओभरको विश्वकपमा भारतीय टोलीको कप्तानी गर्ने सबैभन्दा पाका कप्तान बनेका छन् । रोहितले अष्ट्रेलियाविरुद्ध मैदानमा उत्रिएसँगै यो अनौठो कीर्तिमान आफ्नो नाममा बनाएका छन् ।
रोहितको उमेर अहिले ३६ वर्ष १६१ दिन छ । रोहितले यस मामिलामा मोहम्मद अजहरुद्दिन र राहुल द्रविडलाई पछाडि छोडेका छन् । अजहरुद्दिनले ३६ वर्ष १२४ दिनको उमेरमा विश्वकपमा भारतीय टोलीको नेतृत्व गरेका थिए ।
