एजेन्सी । आईसीसी एकदिवसीय विश्वकप २०२३ मा सहभागी हुन पाकिस्तानी टोली भारत पुगेको छ । भिसा जारी भएको एक दिन पछि पाकिस्तानी टोली बुधवार हैदराबाद आइपुगेको हो ।
पाकिस्तानको पुरुष क्रिकेट टोलीले सात वर्षपछि पहिलो पटक भारत भ्रमण गरेको हो । दुबईमा नौ घण्टाको लामो विश्रामपछि टोली हैदरावाद पुगेका हुन् । निकै कडा सुरक्षा ब्यवस्थाबीच उनीहरुलाई विमानस्थलबाट होटेलसम्म पुर्याइएको थियो ।
विश्वकप क्रिकेटको १३औँ संस्करण अक्टोबर ५ देखि नोभेम्बर १९ सम्म भारतमा आयोजना हुँदैछ । पाकिस्तानी टोलीले यसअघि सन् २०१६ को मार्च ८ देखि अप्रिल ३ सम्म भारतमा आयोजना भएको आईसीसी टी—२० विश्वकप खेलेको थियो ।
सन् १९९२ को आईसीसी विश्वकपको च्याम्पियन पाकिस्तानले सेप्टेम्बर २९ मा २०१९ को उपविजेता न्युजिल्यान्डसँग आफ्नो पहिलो अभ्यास खेल खेल्नेछ। टोलीले अक्टोबर ३ मा पाँच पटकको च्याम्पियन अस्ट्रेलियासँग दोस्रो अभ्यास खेल्नेछ। तर, पाकिस्तान र न्युजिल्यान्डबिचको अभ्यास खेल भने दर्शकविहिन रंगशालामा खेलाइने बताईएको छ । भारतीय क्रिकेट कन्ट्रोल बोर्ड (बीसीसीआई) ले सुरक्षाका कारण पाकिस्तानको पहिलो अभ्यास खेल बन्द रंगशालामा खेलाउन लागिएको जनाएको छ ।
पाकिस्तानले अक्टोबर ६ मा राजीव गान्धी इन्टरनेशनल स्टेडियममा नेदरल्यान्ड्सविरुद्धको पहिलो खेलबाट विश्वकपमा सुरुवात गर्नेछ ।
