काठमाडौँ । साफ यु–१९ फुटबल च्याम्पियनसिपमा निर्णायक खेलमा माल्दिभ्सलाई हराउदै नेपाल सेमिफाइनलमा पुगेको छ ।
सोमबार दिउँसो काठमाडौंस्थित दशरथ रंगशालामा भएको खेलमा माल्दिभ्सलाई ४-१ ले हराउदै नेपाल सेमिफाइनलमा पुगेको हो ।
पहिलो हाफको समाप्तिमा नेपालले माल्दिभ्सविरुद्ध २-० को अग्रता लिएको थियो । नेपालका लागि प्रशान्त लकसमले १८ औ मिनेटमा गोल गर्दै अग्रता दिलाएका थिए । पछि खेलको ३० औ मिनेटमा गोल गर्दै समिर तामाङले टीमलाई दोब्बर अग्रता दिलाए ।
पछि माल्दिभ्सले खेलको ५८ औ मिनेटमा गोल गरेर २-१ को स्थितीमा ल्याएका थिए । यस्तै, खेलको ८८ औ मिनेटमा गोल गर्दै नेपालका निराजन धामिले टिमलाई सेमिफाईनलको लागि पक्का गराए । थप समयको अन्तिम मिनेटमा समिर तामाङले पुन: गोल गरे । समिरको गोलसँगै नेपालले माल्दिभ्सलाई ४-१ ले पराजित गर्दै सेमिफाईनलमा स्थान बनाएको हो ।
समूह ‘ए’ बाट पाकिस्तान यसअघि नै सेमिफाइनलमा गईसकेको छ । समूह ‘बी’ बाट भारत र भुटान सेमिफाइनल पुगिसकेका छन् ।
आजै हुने दोस्रो खेलमा भुटानले भारतको सामना गर्नेछ । यी दुई टोलीबीचको खेल साँझ साढे ५ बजे त्रिपुरेश्वरस्थित दशरथ रंगशालामा सुरु हुनेछ ।
