काठमाडौं । नेकपा एमालेका प्रमुख सचेतक पदम गिरीले शिक्षक आन्दोलनमा समर्थन जनाउँदै उनीहरुका माग यथाशिघ्र पुरा गर्न सरकारको ध्यानाकर्षण गराएका छन् ।
प्रमुख सचेतक गिरीले तत्काल वार्ताबाट समाधान गरी शिक्षकलाई विद्यालयमा फर्काउन सरकारलाई आग्रह गरेका छन् । सार्वजनिक शिक्षालाई गुणस्तरीय, प्रतिस्पर्धी र विश्व बजारमा बिकाउ बनाउन धेरै ठुलो सुधारको खाँचो रहेको बताउदै उनले सडक आन्दोलन गरिरहेका शिक्षकका मागमा सरकारले बेवास्ता गरेको आरोप लगाएका छन् ।
‘सम्बन्धित सबै पक्षसँग परामर्श गरी शिक्षा विधेयक आउनु पर्थ्यो तर त्यसो भएन । जसका कारण देशैभरीबाट हजारौं गुरुहरु अनेक दुखकष्ट सहेर काठमाडौं आई सडक आन्दोलन गरिरहनु भएको छ । जसका कारण लाखौँ विद्यार्थीहरुको पठन पाठन प्रभावित भएको छ । तसर्थ शिक्षकहरुको न्यायोचित मागहरु यथाशिघ्र पूरा गरी खुसी मनका साथ विद्यालय शिक्षकहरु कार्यस्थलमा फर्कने वातावरण बनाउन सरकारसँग माग गर्दछु।’, उनले भनेका छन् ।
गिरीले हजारौं शिक्षकहरु काठमाडौंमा धर्ना दिँदै प्रदर्शन गरिरहँदा सरकारले सार्थक पहल नगरेको आरोप लगाएका छन् । उनले भने,’ ४ दिन सम्म हजारौं शिक्षकहरु काठमाडौका सडकमा धर्ना दिँदै प्रदर्शन गरिरहँदा सरकारले सार्थक पहल नगर्नु विडम्बना हो । तुरुन्त वार्ता मार्फत समाधान दिन आग्रह गर्द्छु ।’
