काठमाडौं । बाग्मती प्रदेश क्रिकेट संघका अध्यक्ष पारस खड्का नेपाल क्रिकेट संघ (क्यान) को आसन्न निर्वाचनमा सचिव पदमा उठ्ने भएका छन् ।
राष्ट्रिय क्रिकेट टोलीका पूर्वकप्तान समेत रहेका खड्का चतुरबहादुर चन्दको प्यानलबाट सचिव पदको लागि उम्मेदवारी दिन लागेका बताईएको छ । यद्यपी खड्काले कुनै औपचारिक घोषणा भने गरिसकेका छैन ।
अन्तर्राष्ट्रिय क्रिकेटबाट दुई वर्षअघि सन्यास लिएका खड्काले यसै पटक काठमाडौं जिल्ला क्रिकेट संघको सदस्यमा सर्वसम्मत निर्वाचित भएका थिए भने बाग्मती प्रदेश क्रिकेट संघको अध्यक्षमा निर्वाचित भएका थिए ।
क्यानको अधिवेशन र विशेष साधारण सभा आजबाट सुरु हुँदैछ । बालुवाटारस्थित आन्मपाली बैंक्वेटमा दिउँसो साढे १२ बजे साधारण सभाको उद्घाटन हुने छ। क्यानका अनुसार पहिलो दिन उद्घाटन र बन्द सत्र मात्र हुने छ। शनिवार नयाँ नेतृत्व चयनका लागि मतदान हुने छ। १७ सदस्यीय केन्द्रीय कार्य समितिका लागि ८६ जनाले मतदान गर्नेछन्।
