इङलिस प्रिमियर लिगमा प्रभावशाली खेल प्रदर्शन गरिरहेको आर्सनलले च्याम्पियन्स लिगको खेलमा पिएसभी आइन्डहोभनलाई एकपक्षीय दबाबमा राखेर प्रभावशाली जित हासिल गरेको छ ।
घरेलु मैदान एमिरेट्समा बुधबार राति भएको खेलमा आर्सनल ४-० ले विजयी भएको हो । आर्सनलको जितमा मध्यान्तरअघि नै पिएसभीको नेटमा तीन गोल भएको थियो ।
फर्ममा रहेका आर्सनलका फर्वार्ड बुकायो साकाले आठौं मिनेटमा गोल गर्दै अग्रता दिलाएका थिए । लियोन्ड्रो ट्रोसार्डले २०औं मिनेटमा दोस्रो तथा गाब्रीएल जेससले ३८औं मिनेटमा तेस्रो गोल गरेका थिए ।
कप्तानीको जिम्मेवारी पाएका मार्टिन ओडेगार्डले ७०औं मिनेटमा आर्सनलको लागि चौथो गोल गरेर जित सुनिश्चित गरेका थिए ।
यो जितसँगै आर्सनलले समूह ख बाट ३ अंक हासिल गरेको छ ।
अर्को खेलमा स्पेनिस क्लब सेभिया र फ्रेन्च क्लब लेन्सले १-१ को बराबरी खेल्दै अंक बाँडेका छन् ।
यस समूहमा आर्सनल सहित पिएसभी आइन्डहोभन, सेभिया र लेन्स रहेका छन् ।
