काठमाडौं । चिनियाँ विदेशमन्त्री वाङ यीले भारतीय विदेशमन्त्री एस जयशंकरलाई एक पत्र पठाएर महामारीका कारण भारतले गरिरहेको संघर्षप्रति सहानुभूति दिएका छन् ।
उनले बिहीबार नै भारतीय विदेशमन्त्री जयशंकरलाई पठाएको पत्रमा कोरोना महामारी कुनै एक देश या क्षेत्रमा मात्र सीमित नरहेर विश्वका देशहरुलाई नै ठूलो दुःख दिइरहेको भन्दै चीन सरकारका तर्फबाट भारतीय सरकार र त्यहाँका जनतालाई सान्त्वना प्रकट गरेका छन् ।
विदेशमन्त्री वाङले भनेका छन्– यो महामारी अहिलेको मानव जगतकै शत्रु बनेर आएकोले यसको उन्मूलनका लागि विश्वका सबै समुदायहरुको ऐक्यबद्धताको आवश्यकता रहेको बताएका छन् ।
त्यस पत्रमा उनले चीनले आफ्नो देशमा उत्पादन भइरहेका कोभिड १९ का विरुद्धमा लड्नका लागि आवश्यक पर्ने औषधि तथा स्वास्थ्या सामग्रीहरु सहयोग स्वरुप प्रदान गर्ने पनि बताएका छन् ।
उनले भनेका छन्– हामीले भारतले पछिल्लो समयमा महामारीका कारण पाएको दुःख र संघर्ष देखेका छौँ, त्यसैले यस्तो अप्ठेरो अवस्थामा आवश्यक रुपमा गर्नसक्ने सहयोग चीनले गर्नेछ ।
उनले चिनियाँ स्वास्थ्य सामग्रीहरु भारतमा प्रवेश गरिसकेका र ती सामग्रीहरु भारतमा पठाउनका लागि जतिसक्दो चाँडै काम भइरहेको भन्दै अन्य थप आवश्यक सहयोगको बाचा पनि गरेका छन् ।
