काठमाडौं । लुम्बिनी प्रदेशका मुख्यमन्त्री शंकर पोखरेललो आफ्नो पदबाट दिएको राजीनामा सो प्रदेशका प्रदेश प्रमुख धर्मनाथ प्रसाद यादवले स्वीकृत गरेका छन् । उनले आजै बिहान राजीनामा दिएका थिए ।
मुख्यमन्त्री पोखरेलले आफूविरुद्धको अविश्वास प्रस्तावमा मतदान हुनुअघि नै मुख्यमन्त्री पदबाट राजीनामा दिएका थिए । उनको राजीनामा प्रदेश प्रमुख धर्मनाथ यादवले तत्कालै स्वीकृत गरेको बताइएको छ ।
तर पनि त्यस प्रदेशमा नयाँ सरकारको गठनको विषयलाई लिएर ठूलो विवाद उत्पन्न भएको छ । उनको राजीनामापछि पनि त्यहाँ विपक्षीहरुको बहुमत पुग्ने अवस्था देखिएको छैन । मुख्यमन्त्री पोखरेलका विरुद्धमा अजै विपक्षी दलहरुले अविश्वासको प्रस्ताव दर्ता गराउँदै थिए ।
त्यो थाहा पाएर नै उनले आज राजीनामा दिएका थिए । तर पनि विपक्षी दलको बहुमत नपुग्ने देखिएको छ । यदि त्यसो भयो भने आज नै सबैभन्दा ठूलो दलको हैसियतबाट सरकार गठनका लागि प्रदेश प्रमुखले आह्वान गर्नुपर्ने हुन्छ ।
त्यसपछि भने नेकपा एमालेले संसदको सबैभन्दा ठूलो दलको हैसियतमा नयाँ सरकार गठन गर्ने भएको छ । मुख्यमन्त्रीमा पोखरेललाई नै आजै सपथ ग्रहण गराउने तयारी भएको एमालेका एक नेताले बताएका छन् ।
प्रदेश प्रमुखले आजै नयाँ सरकार गठनको आह्वान गर्ने र एमालेले बहुमत प्राप्त दलको हैसियतमा नाम पठाएपछि पोखरेलले मुख्यमन्त्री पदको सपथ ग्रहण गर्ने तयारी भइरहेको ती नेताको भनाइ छ ।
नेकपा एमालेले लुम्बिनीमा एकल बहुमतको सरकार गठन गर्ने दाबी गर्ने भएको छ । आफू संविधानको धारा १६८ को उपधारा २ अनुसार मुख्यमन्त्री बनेको र अब १६८ को १ अनुसार एकल सरकार गठन गर्ने भन्दै पोखरेल त्यसको तयारीमा जुटेका एकजना नेताले बताए ।
यसअघि हालैमात्र नेकपा एमालेमा प्रवेश गरेपछि माओवादीका दुई र जसपाका चार सांसद पदमुक्त भएका थिए । त्यसपछि लुम्बिनी प्रदेशसभामा हाल ८१ सांसद छन् । त्यसमध्ये एमालेसँग मात्रै ४१ सांसद छन् । यो संख्याले एमालेले नै बहुमतको एकल सरकार बनाउन पाउने भएकोले त्यसको दाबीमा लाग्ने बताइएको छ ।
