काठमाडौं । प्रधानमन्त्री केपी शर्मा ओली आज अकस्मात राष्ट्रपति कार्यालय शीतलनिवास पुगेका छन् । त्यसो त उनले आजै अकस्मात बालुवाटारमा आकस्मिक स्थायी कमिटी बोलाएका थिए ।
सो बैठक सकिए लगत्तै प्रधानमन्त्री ओली शीतलनिवास पुगेको समाचार स्रोतले बतायो । स्रोतका अनुसार प्रधानमन्त्रीले शीतल निवासमा पनि अकस्मात नै समय माग गरेका थिए ।
अहिले राष्ट्रपति विद्यादेवी भण्डारी र प्रधानमन्त्री ओलीबीच भेटवार्ता चलिरहेको बताइएको छ । तर यो भेट भने नियमित रहेको प्रधानमन्त्री कार्यालयले जनाएको छ ।
तर समाचार स्रोतले बताए अनुसार नियमित भेटघाटका लागि शीतलनिवासमा हिजो नै प्रधानमन्त्री कार्यालयबाट समय माग गरिएको हुन्छ । आज उनी अकस्मात शीतल निवास पुगेको जनाइएको छ ।
प्रधानमन्त्रीले आजै मन्त्रिपरिषदको बैठक बोलाएका छन् । त्यसो त नियमित बैठक सोमबार हुने गर्दथ्यो । सो बैठक अगावै आजै उनले नेकपा एमालेको अध्यक्षको हैसियतले स्थायी कमिटीको बैठक बोलाएका थिए ।
मन्त्रिपरिषद बैठक अगावै उनी शीतल निवासमा परामर्शका लागि जानुलाई कतै सरकारले प्रदेश सरकारहरुको विघटनको बारेमा त तयारी गर्दैछैन भनेर पनि कतिपयले अनुमान गरेका छन् । लुम्बिनी प्रदेशमा आज मुख्यमन्त्री शंकर पोखरेल अल्पमतमा पर्नेगरी राजनीतिक परिवर्तनहरु भएकोले यस विषयमा उनले शीतल निवाससँग छलफल पनि गरेको हुनसक्छ ।
मुख्यमन्त्री पोखरेल प्रधानमन्त्रीका निकटवर्ती हुन् । यो समेत गरी विभिन्न प्रदेश सरकारहरुमा प्रधानमन्त्री ओलीको पार्टी अल्पमतमा पर्दै गएकोले यस विषयमा पनि आवश्यक परामर्श गर्नसक्ने बताइएको छ ।
उता देशमा कारोना महामारीको संकट रहेकोले सरकारले स्वास्थ्य संकटकालको घोषणा गर्ने बारेमा पनि आवश्यक छलफल गरिरहेको बताइएको छ । प्रधानमन्त्री ओलीले ४ बजे बालुवाटारमा मन्त्रिपरिषद बैठक बोलाएका छन् ।
